Qaıyry mol qaıyrymdylyq sharalary

Sharaǵa QHA músheleri men kásipkerler, mesenattar men etno­má­denı birlestikterdiń ókilderi, «Jańǵyrý joly» respýblıkalyq jastar qozǵalysynyń ókilderi men eriktileri atsalysyp, 11 674 medısınalyq qyzmetkerge jáne 7100 otbasyǵa qaıyrymdylyq jasady.

Naqtyraq aıtqanda, vırýs anyq­­­­­talǵan naýqastarmen tike­leı ju­­mys isteıtin medısına qyz­metkerleriniń otbasyna, pro­vı­zor­­­lyq ortalyqtarǵa, dári­ger­ler oqshaý turyp jatqan jataq­ha­na men qonaqúılerge qurbandyqqa sha­lynǵan mal eti taratylyp, azyq-túlik sebetteri tartý etildi. Sta­sıonarda jatqan emdelýshiler men qyzmet barysyndaǵy aq halat­ty abzal jandarǵa ystyq tamaq jet­kizilip, kókónis pen jemister, tát­ti­ler men ulttyq sýsyndar úles­ti­­rildi.

Pandemııa dertinen baqılyqqa at­tanǵan dárigerlerdiń otbasyna da qarjylaı kómek kórsetilip, ul-qyzdaryna merekelik syılyq jasaldy. Muqtaj otbasylarǵa da kóńil bólinip, mal etinen bólek, túrli azyq-túliktermen qamtamasyz etildi.

Solardyń ishinde astanalyq «Vaınah» cheshen-ıngýsh, «Hazar» ázerbaıjan, «Tań» tatar-bashqurt, «Qyrǵyzstan-Astana» jáne «Jaı­hýn» qaraqalpaq etnomádenı bir­lestikterin, Qaraǵandy, Qy­zylorda, Pavlodar, Atyraý, Qos­tanaı oblysy men Almaty qalasynyń barlyq etnos ókilderin, Analar keńesin, «Jańǵyrý joly» jastar qozǵalysyn, Soltústik Qazaqstan oblystyq «Dýslyk» tatar-bashqurt qoǵamdyq ortalyǵyn, Túrkistan oblystyq ózbek, tatar, ázerbaıjan etno-má­denı ortalyqtaryn, Almaty oblysy Uıǵyr aýdany QHA belsendilerin aıryqsha atap ótýge bolady.

Esterińizge sala ketsek, QHA naýryz aıynda engizilgen tótenshe jaǵ­daı kezinde respýblıkalyq «Biz birgemiz!» aksııasy aıasynda muq­taj azamattarǵa 376 454 347 teń­ge­ge qar­jy­laı kómek kórsetip, 515 myń­nan astam medısınalyq maska taratqan edi.

Pnevmonııa derti ýshyqqan soń­ǵy bir aıda aq halatty abzal jandar men provızorlyq ortalyqtarǵa qol ushyn sozyp, 151 443 526 teńgege qajetti dári-dármek pen ókpeni jasandy jeldetý apparatta­ryn satyp aldy. Al Maqtaaralda oryn alǵan sý tasqynynan zardap shekken­derge de etnos ókilderi ju­dy­ryq­taı ju­mylyp, 101 936 000 teńgege 335 tonna gýmanıtarlyq kómek pen qurylys materıaldaryn jónelt­ken bolatyn.

Byltyrǵy jyly Assambleıanyń ár­túrli deńgeıdegi qaıyrymdylyq sharalarǵa kórsetken kómegi 4,5 mlrd teńgege jýyqtaıdy.