Astana mańyndaǵy 36-shy desanttyq-shabýyldaýshy brıgadasynda Qurlyq áskerleriniń 30 shaqty garnızonynan kelgen Qazaqstan Respýblıkasy Qarýly Kúshteriniń 100-ge tarta áskerı psıhologtary men áıelder keńesi tóraıymdarynyń qatysýymen oqý-jattyǵýlar ótti.
Astana mańyndaǵy 36-shy desanttyq-shabýyldaýshy brıgadasynda Qurlyq áskerleriniń 30 shaqty garnızonynan kelgen Qazaqstan Respýblıkasy Qarýly Kúshteriniń 100-ge tarta áskerı psıhologtary men áıelder keńesi tóraıymdarynyń qatysýymen oqý-jattyǵýlar ótti.
Mundaı oqý-jattyǵýlar áskerı psıhologtarǵa sarbazdardyń soǵys jaǵdaıynda ózderin qalaı sezinetinin jáne soǵan laıyq áreket etýdiń mashyqtaryn úıretý úshin ótkizildi. Birinshi kúni jıynǵa qatysýshylar teorııalyq jaǵyn úırense, ekinshi kúni, ıaǵnı keshe praktıkalyq jattyǵýlar júrdi. Qurlyq áskerleriniń psıhologtary men áıelder keńesi tóraıymdary bul oqý-jattyǵýlar barysynda erekshe daıyndyqtaryn pash etti. Shynjyr tabandy ondaǵan tonnalyq T 72 tankisiniń gúriliniń ózi adam denesin titirkendiredi. Biraq, soǵan qaramaı, ótip bara jatqan tanktiń astynda buǵyp qalyp, sońynan granata laqtyrý úırenshikti daǵdyǵa aınalyp ketkendeı. Bul synaqtan barlyǵy da súrinbeı ótti. Tipti aramyzdaǵy batyl áriptes qyzdarymyz áskerılerdiń tásilin qaıtalap, kórermenderine bul is-qımyldarǵa túsinik te berip jatty. Sondaı-aq, jattyǵý barysynda ádettegi AK-74 avtomatynan oq atý jattyǵýlary boldy.
Budan basqa, áskerı psıhologtardyń basym bóligin quraıtyn názik jandar toby otty beldeýden ótýden synaq tapsyrdy. Qoıý qara tútin men atylǵan oqtardyń daýysy kedergilerdi eńserýge aıtarlyqtaı qıyndyqtar týǵyzdy. Bıik kedergilerdiń ústinen asyp ótýde keıbir qyzdardyń boıy jetpeı, qınalǵan sátter az bolǵan joq. Ondaı kezde qoıý qara tútin arasynan kedergilerdi aınalyp ótip, aspaly kópirden qulap qalmaı, márege jetken názik jandar synaqtaryn oıdaǵydaı tapsyryp jatty.
Biz osy rette №35748 áskerı bólimniń memlekettik tildi damytý qyzmetiniń bastyǵy ári áıelder keńesiniń tóraıymy maıor Elmıra Jumashevany sózge tartqan edik. Onyń aıtýynsha, synaq qıyn bolǵanymen, názik jandar olardy oıdaǵydaı tapsyrǵan. Áıtse de, týnnelden ótý kezinde gazǵa ýlanyp, esinen tanyp qalý qaýpi bolǵanyn da jasyrmady. Degenmen de, bul oqý-jattyǵýlary olardyń óz kásibı deńgeıi men daıarlyǵyn anyqtaýǵa múmkindik týǵyzǵan. Oqý-jattyǵýlardyń basy-qasynda júrgen Qurlyq áskerleri qolbasshysynyń tárbıe jumysy jónindegi orynbasary polkovnık Jumabek Hasenovtiń sózine qaraǵanda, qazirgi tańda álemde áskerı psıholog mamandaryna barynsha jaǵdaılar jasalýda. Olardyń jumysynyń mańyzy ofıserler men sarbazdardyń soǵys jaǵdaıynda basynan ótkeretin jaıttaryn barynsha túsinip, durys baǵdar berýinde jatyr. Osy turǵydan kelgende oqý-jattyǵýlardyń mańyzy arta túsedi.
Qurlyq áskerleriniń Bas qolbasshysy general-leıtenant Murat Maıkeevtiń ózi muryndyq bolǵan bul eki kúndik jıyn Memleket basshysy – Qazaqstan Qarýly Kúshteriniń Joǵarǵy Bas qolbasshysy Nursultan Nazarbaevtyń «áskerimiz shaǵyn da utqyr ári kásibı bolýy kerek» degen talabyna saı júzege asyp otyr. Qazirgi tańda elimizdiń Qarýly Kúshteri kásibı deńgeıge ıek artýda. J.Hasenov osy turǵydan kelgende adam psıhologııasy mańyzdy sanalatynymen bólise ketti. Ol eń aldymen, áskerı qyzmetker óziniń komandırine, qolbasshysyna, Elbasy men halqyna adaldyǵyn dáleldeýi tıis degendi erekshe atady.
Qoryta aıtqanda, Qorǵanys mınıstrligi áskerı mamandardy daıarlaýǵa erekshe mańyz berip keledi. Qazirgi tańda áskerıler ózderiniń mindetterin alańsyz oryndaý úshin barlyq jaǵdaılar jasalýda.
Asqar TURAPBAIULY,
«Egemen Qazaqstan».