Búgin Sybaılas jemqorlyqqa qarsy qyzmettiń alańynda ótken "Antikor.LIVE" tikeleı efırinde "О́rken" Qazaqstandyq respýblıkalyq salaaralyq yntymaqtastyq qaýymdastyǵy" zańdy tulǵalar birlestiginiń prezıdenti Bolat Omarov kásipkerlerge qurylys salasyndaǵy jemqorlyqpen kúresýge járdem kórsetetin bastama týraly aıtty.
"Biz "Nur Otan" partııasy janynan kásipkerlikti qoldaý jónindegi Qoǵamdyq keńes qurdyq. Qoǵamdyq keńestiń quramyna atqarýshy organdardyń, "Atameken" UKP, "Damý" qorynyń jáne basqa da damý ınstıtýttarynyń ókilderi kiredi. Bul uıymdardyń ózara is-áreketi nátıjesinde kásipkerlikti qoldaý ǵana emes, ákimshilik tosqaýyldardan qorǵaý, sondaı-aq sybaılas jemqorlyq táýekelderin azaıtý máseleleri de sheshilýde", - dep atap ótti Bolat Omarov.
Qoǵamdyq keńes "Sapaly Qurylys" jobalyq keńsesin qurýǵa bastamashy bolady, onda joǵaryda atalǵan organdar men damý ınstıtýttarynyń ókilderi QR Sybaılas jemqorlyqqa qarsy is-qımyl agenttiginiń ókilderimen birlesip qurylys salasyndaǵy bıznes múddelerin qorǵaıtyn bolady.
Atap aıtqanda, jobalyq jáne ózge de ruqsat berý qujattamasyn kelisý merzimderin qysqartý úshin kelisý jáne qurylys salýshylardyń ótinishterine jaýap alý merzimderin qatań shekteýmen "Biryńǵaı tereze" qurý usynylady.
Bolat Omarovtyń aıtýynsha, kásipkerler naryq monopolısteri tarapynan kedergilerge de tap bolady, endi oǵan Qoǵamdyq keńes pen «Sapaly Qurylys» jobalyq keńsesiniń nazary aýdarylady.