Shoq juldyzdaı shaǵyn ǵana Qoshqarbaı aýylynda Uly Otan soǵysynda opat bolǵandar men qan maıdannan aman-esen oralyp, keıin ómirden ozǵan ardagerlerge arnalǵan eskertkish boı kóterdi. Eldik pen erliktiń belgisi ispetti. Keıingi tolqynnyń qurmeti men qoshemeti.
Jaman tumaýdan jasqanyp, jamaǵatty jıyp ashylý saltanatyn ótkize almasa da, as berilmese de, saýaby mol salıqaly istiń jaqsy habary dúıim jurtty eleń etkizgen. Aýyl shetine at tabanyn iliktirgende-aq alystan andaǵaılap kózge túsetin sáýletti, mazmundy, eńseli eskertkish eken. El aǵasy, osyndaǵy «Shoqqaraǵaı» sharýa qojalyǵynyń basshysy Qaıyrken Hasenovpen tildestik. El jıylyp eskertkish qoısaq dep osydan on jyl buryn oqtalǵan syńaıly. Áýeli erlerdiń tizimi jasalǵan. Maıdanda opat bolǵany da, el shetine aman-saý ilikkeni de. Arada kóp ýaqyt ótip ketken soń sorabyn tabý ońaıǵa soqpasa kerek.
Imandy istiń basy-qasynda júrgen osy aýyldyń týmasy Janǵalı Hasenovtyń aıtýyna qaraǵanda, ákesi Saǵdıdyń esinde jetpiske jýyq adam qalypty. Maıdangerler tiziminen eshkimniń esimi jazataıym qalyp qoımas úshin «Bozdaqtar» jınaǵynyń birneshe tomyn súzip shyǵýǵa týra kelgen. Aýyl aqsaqaly Jumash Jylqybaev biraz derekti tiriltipti. Aýdandyq áskerı komıssarıattyń qundy derekke bókken qalyń kitaby bul taraptaǵy izdenistiń sońǵy núktesin qoıdy. Múldem habarsyz ketken aýyldastar taǵdyry aıqyndalǵan. Bul oraıda, Zerendi aýdandyq áskerı komıssarıatynyń qyzmetkerleri Nysanáli Násipqalıev pen Aınur Baımekenovanyń kómegi kóp tıgen. Áskerı komıssarıattyń alynǵan derekte 150 adamnyń tizimi jasalǵan. Keıbiri, tipti beıtanys. Sóıtse burynǵy «Lenın» kolhozyna qaraǵan Qoshqarbaı, Keńótkel, О́ndiris, Eńbek-Birlik aýyldary tutas biriktirilgen eken. Ara-jigi ajyratyp alyndy. Bótendigi joq, osy ólkeniń órenderi.
Endigi másele – eskertkish kompozısııasy. Alystan kóz tartatyn bıik stella asqaq arman men ór rýhty beıneleýge tıis. Áýel bastaǵy esertkish ornatýdaǵy maqsat ta erlerdiń esimderin el esinde saqtaý ǵana emes, keıingi urpaqtyń boıyna rýh darytý, ónege órbitý. Osy oıdy sáýlet tilimen qalyptap, kórgen jurttyń kóńiline oı tastaý qajet. Jerles sáýletshi Turlybek Kochıkov eskızin ázirlegen.
Kóktem shyǵysymen bolashaq eskertkishtiń aýmaǵyna qada qaǵylǵan, ile qarjy jınaý bastalypty. Ata arýaǵyn asqaqtatýǵa jurt jumyla kirisken. Qolda baryn aıamaǵan kórinedi. Qurylys materıalynyń negizgi detali – stellany Qaırat Kenjeǵarın taýyp berse, Meketaı Aıdarhanov pen Sapar Qudaıbergen aýylǵa jetkizgen. Aıgúl Jylqybaeva men Almat Baltaǵarın qujattardy rásimdeýmen aınalysqan. Al istiń jýan ortasynda júrgen Qaıyrken Hasenov tehnıkasyn bólip, jumysshylaryn jumyldyryp, jetpeı jatqan qarjynyń qomaqty bóligin ózi kótergen. Aıtpaqshy, osy sharýa qojalyǵynyń óz aýylyna mektep, meshit salyp bergendigin aıta ketsek te artyq bolmas. Qazir 25 adamdy jumyspen qamtyp otyr. Qazaqtyń aqbas sıyry men jylqysyn baǵyp, eki jarym myń gektar jerge egin egip, el irgesin bekemdeýge aıryqsha úles qosyp júrgen azamat.
Qoshqarbaı aýylynan qan maıdanǵa júzden astam azamat alynǵan eken. Teń jartysy maıdan dalasynda opat bolypty. Bir shańyraqtan attanǵan tórt-bes azamattyń bári birdeı opat bolyp, urpaq órbimegenderi de bar eken. Ýaqyt óte kele, sol bozdaqtardyń attary umytylyp, el esinen birtindep óshe bastaǵan. Endi mine, máńgilik óshpesteı qaıta jańǵyryp otyr. Imandy istiń basy-qasynda júrgen barsha el azamattarynyń ortaq ıgilikti isi – bul.
Aqmola oblysy,
Zerendi aýdany