Premer-Mınıstr Asqar Mamınniń tóraǵalyǵymen ótken Úkimettiń selektorlyq otyrysynda jumyspen qamtýdy qoldaý sharalaryn iske asyrý barysy qaraldy, - dep habarlaıdy Egemen.kz.
Eńbek jáne halyqty áleýmettik qorǵaý mınıstri B. Nurymbetov, Shyǵys Qazaqstan oblysynyń ákimi D. Ahmetov, Jambyl oblysynyń ákimi B. Saparbaev, Shymkent qalasynyń ákimi M. Áıtenov, Soltústik Qazaqstan oblysynyń ákimi Q. Aqsaqalov, Batys Qazaqstan oblysynyń ákimi Ǵ. Esqalıev baıandama jasady. Bıyl «Eńbek» memlekettik baǵdarlamasynyń, Jumyspen qamtýdyń jol kartasynyń jáne basqa da salalyq baǵdarlamalar aıasynda jumyspen qamtý sharalary 743 myń adamdy qamtydy. Jyldyń sońyna deıin 1 mln 220 myń adamǵa qoldaý kórsetiledi.
Memleket basshysynyń tapsyrmasymen Jumyspen qamtýdyń jol kartasy aıasynda turaqty jumys oryndaryn qurýǵa jáne óńirlerdiń áleýmettik ınfraqurylymyn jaqsartýǵa basa nazar aýdarylyp, ınfraqurylymdyq jobalardyń tizbesi ońtaılandyryldy. Osy jobalar (6 702 joba) aıaqtalǵan soń, aralas salalarda qosymsha 100 myńnan astam turaqty jumys oryndary qurylady. Premer-Mınıstr Shymkent qalasynda, Jambyl, Soltústik Qazaqstan jáne Shyǵys Qazaqstan oblystarynda jumyspen qamtýdy qoldaý sharalaryn iske asyrýdyń joǵary qarqynyn atap ótti. Ortasha kórsetkishter Qaraǵandy, Aqmola, Túrkistan, Aqtóbe, Qostanaı, Mańǵystaý, Almaty, Pavlodar, Atyraý oblystarynda, Nur-Cultan jáne Almaty qalalarynda baıqalady.
Sonymen qatar jekelegen kórsetkishter boıynsha eki óńir artta qalyp otyr: Qyzylorda oblysynda — memlekettik granttar berý 47,5%, qoǵamdyq jumys – 50,1%, jobalarǵa bólingen qarjyny ıgerý – 56,2% jáne jumys oryndary qurý – 44,4%. Batys Qazaqstan oblysynda — mıkrokredıt berý boıynsha tek 28,6%, jastar tájirıbesi – 37,7%, jobalarǵa bólingen qarjyny ıgerý – 58,9% jáne turaqty jumys oryndaryn qurý boıynsha 25,8% deńgeıinde. «Jyl sońyna deıin tórt aı ǵana qaldy. Ákimdikter baǵdarlamalardy iske asyrý jumystaryn jandandyrýy qajet. Qazirgi jaǵdaıda birinshi kezektegi mindet – bul azamattardy jumyspen qamtamasyz etý. Qajetti resýrstar bólingen, barlyq quraldar bar, eńbek naryǵynda teńgerimsizdikterdiń paıda bolýyna jol bermeý kerek», — dedi A. Mamın.
Úkimet basshysy memlekettik baǵdarlamalarda qarastyrylǵan is-sharalardy júzege asyrýdy, sondaı-aq Elektrondyq eńbek bırjasynyń bıznes-prosesterin ońtaılandyrý, jumyspen qamtý sharalarymen proaktıvti qamtýdy damytý jáne olardy iske asyrý monıtorıngin kúsheıtý jóninde sharalar qabyldaýdy tapsyrdy. Ákimdikterge árbir jumyssyz adamnyń profaılyn qurý jáne onymen jumyspen qamtýǵa járdemdesý boıynsha ataýly jumys júrgizý tapsyryldy. Jumyspen qamtýdyń josparlanǵan ındıkatorlaryna qol jetkizip, turaqty jumys oryndaryn qurýǵa erekshe nazar aýdarý qajet. Ulttyq ekonomıka, aýyl sharýashylyǵy mınıstrlikterine «Atameken» UKP jáne ákimdiktermen birlesip, bıznes bastamalardy damytý jáne qoldaý boıynsha jumysty jandandyrý tapsyryldy.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.