Qazaqstandyq tankishiler jarysqa daıyn

Jerebe nátıjesinde Qazaq­stan komandasy sary túske boıal­ǵan tórt tankige ıe boldy. Kon­kýrs uıymdastyrýshylary – reseılik taraptan usynylǵan tehnıkany tehnıkalyq qamtamasyz etý toby ofıserleriniń basshylyǵymen ekıpajdar  qabyldady.

Qabyldaý barysynda tanki­lerdiń teh­nıkalyq jaǵdaıy, jaýyn­gerlik mashı­nanyń bólik­teri jáne mehanızmderiniń jaram­dylyǵy men qabilettiligi tek­serildi. Sonymen qatar tank­terdiń tehnıkalyq qamtamasyz etilýi jáne paıdalaný aldyndaǵy daıyndyqqa nazar aýdaryldy.

Qazaqstandyq áskerı qyzmetshiler jaýyngerlik mashı­nalardyń jaǵdaıy qana­ǵattanarlyq ekendigin jáne «Tank bıatlony» saıysy aıasyn­daǵy barlyq tapsyrmalardy oryndaýǵa múmkindik beretinin atap ótti.

Jarys bastalmas buryn qazaq­standyq tankishilerge qarý-jaraqtyń daıyn­dyǵy men dáldigin durystap, tank bıatlony trassasynyń baǵytyn muqııat zerdeleý qajet.

Qazaqstan Qarýly Kúshteri­niń komandasyna halyqaralyq baıqaýǵa irikteý kezeńderiniń kóshbasshylary – tankishi mamandar tańdaldy. Aldyn ala kezeń­der barysynda «Oń­tús­tik», «Shyǵys», «Batys» óńir­lik qolbasshylyqtary­nyń jáne Desanttyq-shabýyldaý ás­ker­leriniń atynan tórt tank maman­darynyń ekıpajy irikteldi. Elimiz atynan synǵa túsetin komandany QR QK Bas shtaby bastyǵynyń orynbasary general-maıor Ádilbek Aldabergenov basqarady.

Eske sala keteıik, Armııa halyqara­lyq oıyndary-2020 aıasynda ótkiziletin «Tank bıatlony» halyqaralyq jarysy 23 tamyz – 5 qyrkúıek araly­ǵyn­da «Alabıno» polıgonynda ótedi. Qazaqstandyq komanda alǵashqy jeke jarysyn 25 tamyz kúni  bastap, Qyrǵyzstan, Reseı jáne О́zbekstan tankishilerimen birge bir topta óner kórsetedi.

Atalǵan oıyn 2013 jyldan beri ótkizilip keledi. Qatysýshy elderdiń sany da jyl saıyn artýda. Bıyl «Tank bıatlonyna» 16 eldiń komandalary qatysady. Sarapshylar atap ótkendeı, baıqaýdyń eń myqtylary – Belarýs, Qazaqstan, Qytaı jáne Reseı qatysýshylary.

«Tank bıatlony» – bıyl qazaq­standyq komanda qa­tysa­tyn jalǵyz baıqaý. Bul jal­py komandalyq júldeli oryn­­dardy jeńip alý múmkin­digin aı­tar­lyqtaı tómendetedi. О́ıt­keni kóptegen baıqaýlarda joǵar­ǵy upaı jınaǵan komanda jeńis­ke jetedi. Soǵan qaramas­tan, qazaq­­stan­dyq jaýyn­ger­ler jeńis tuǵyrynan kórinýge úmitti.

«Tank bıatlony» tankti basqarý, kedergilerden ótý jáne zeńbirek pen pýlemetten nysana kózdeý sııaqty joǵary she­­ber­­likti ǵana emes, sonymen qatar úılesimdilikti, ekıpaj músheleriniń is-qımylyn úılestirýdi, jaqsy dene daıyn­dyǵyn talap etedi.