Aıagóz aýdanyndaǵy Jaqsybulaq stansasynda uıytqı soqqan qatty jeldiń saldarynan júk vagondary jyljyp, qarama-qarsy kele jatqan poıyzǵa soqtyǵysqan.
«25 tamyz kúni tańǵy saǵat 8:15-te temir jol stansasynda turǵan júk vagondary qatty jeldiń saldarynan №3471 júk poıyzyna qarama-qarsy qozǵalǵan. Joıqyn soqqynyń áserinen 1525 shaqyrymda lokomotıv pen 23 vagon relsten shyǵyp ketken. Lokomotıvten órt shyqqan. Opat bolǵandar men zardap shekkender joq» dep habarlaıdy «Qazaqstan temir joly» UK» AQ baspasóz qyzmeti.
Oqıǵa oryn alǵan jerge Balqash, Aqtoǵaı stansalarynan jaǵdaıdy qalpyna keltirý jáne órt sóndirý poıyzdary jóneltildi. Apattyń sebep-saldaryn tolyq tekserý úshin arnaıy jasaqtalǵan komıssııa da jolǵa shyqqan.
Shoıyn joldyń boıynda bolǵan apat «Nur-Sultan Nurly jol – Dostyq» qatynasyndaǵy №54 poıyzdyń baǵytyna bóget boldy. Alaıda poıyz jolaýshylary jol júrý bıletterinde kórsetilgen mejeli jerlerine uıymdastyrylǵan avtobýstarmen jóneltildi.
«Túıeni jel shaıqasa, eshkini kókten izde» demeı me?! Tonna-tonna vagondardy jyljytqan jel ózge nysandarǵa bálendeı kesirin tıgize qoıǵan joq bolar...
Mereı QAINARULY,
jýrnalıst
Shyǵys Qazaqstan oblysy