Jańa oqý jyly qarsańynda «Nazarbaev zııatkerlik mektepteri» derbes bilim berý uıymynyń ókilderi NIS ujymynyń atynan Túrkistan oblysyndaǵy sý tasqynynan zardap shekken eki aýyldyń oqýshylaryna syılyqtar tabystady. Onyń ishinde 719 mektep formasynyń jıyntyǵy, 36 noýtbýk, balalarǵa arnalǵan kórkem ádebıetter men pedagogterge arnalǵan ádistemelik ádebıetter bar.
О́rgebas aýylynda alǵashqylardyń biri bolyp jańa mektep formasyn alǵan Janar Mamrejepova. Ol synyptastarymen birge elimizdiń barlyq balalary bilim alýdy armandaıtyn Nazarbaev zııatkerlik mektepteri júıesiniń qoldaýyn maqtan tutatynyn jetkizip, ustazdary men ata-analardyń aldynda bala armanymen bólisti, keleshekte pedagog bolǵysy keletinin aıtty.
Túrkistan oblysynyń Maqtaaral aýdanyndaǵy sý tasqynynan keıin Nazarbaev zııatkerlik mektepteri júıesiniń ujymy zardap shekkenderge kómek kórsetý qoryna qarajat aýdarǵan bolatyn. Qaıyrymdylyq naýqanyna barlyq zııatkerlik mektepterdiń ustazdary men qyzmetkerleri, tórt birdeı ortalyq – pedagogıkalyq sheberlik, pedagogıkalyq ólsheýler, aqparattyq tehnologııalar, sondaı-aq ortalyq apparat úles qosty. Eki aýylǵa ataýly kómek kórsetý týraly sheshim qabyldanyp, О́rgebas aýylyndaǵy Q.Amanjolov atyndaǵy orta mekteptiń jáne Jeńis aýylyndaǵy Q.Músirepov atyndaǵy orta mekteptiń oqýshylaryna qol ushyn sozdy. Sý tasqynynan keıin eki mekteptiń de ǵımarattary qatty zardap shekken edi. Qazir О́rgebas aýylynda kúrdeli jóndeý jumystary áli de jalǵasýda, al Jeńis aýylynyń oqýshylary qashyqtan oqytý júıesi aıaqtalǵan soń jańa ǵımaratta bilim almaq.
Sanıtarlyq-epıdemııalyq jaǵdaıǵa baılanysty syılyqtardy tabystaý birneshe ustazdar men oqýshynyń, sondaı-aq ata-analar komıtetiniń ókilderiniń qatysýymen shaǵyn ortada ótti.
Maqtaaral aýdanynyń ákimi Baqyt Asanov Nazarbaev zııatkerlik mektepteriniń júıesi balalarǵa ataýly qoldaý kórsetý arqyly qýanyshqa bólegenin aıtty:
– Mektep formasy, kompıýterlik tehnıka jıyntyǵy, kórkem jáne ádistemelik ádebıetter – bilim berý salasynda jańa oqý jyly qarsańyndaǵy eń mańyzdy kómek, – dedi aýdan basshysy.
Al Shymkent qalasy hımııa-bıologııa baǵytyndaǵy Nazarbaev zııatkerlik mektebiniń dırektory Balqan Qasymovtyń aıtýynsha, shalbarlar, penjaktar, jeıdeler, jáketter, keýdesheler – barlyq mektep formasy otandyq taýaróndirýshilerdi qoldaý maqsatynda shymkenttik «SABTEX» JShS-da tapsyryspen tigildi. О́rgebas aýylyndaǵy orta mekteptiń dırektory Dáýrenbek Ábdiǵalı balalarǵa arnalǵan noýtbýktar men muǵalimderge arnalǵan ádistemelik ádebıetterge rızashylyǵyn bildirip, mamyrdaǵy sý tasqyny óńir úshin synaq bolǵanymen turǵyndar elmen birge ekenin jete túsine túskenin jetkizdi.
Aıta ketelik, kezdesýge kelgen О́rgebas aýylyndaǵy orta metkepte alty balasy bilim alatyn kópbalaly ana Aıman Batyrbekovanyń tuńǵyshy jańa oqý jylynda mektepti támamdaǵaly otyrsa, kenjesi birinshi synypqa barady eken.
– Elimizdiń túkpir-túkpirinen san myńdaǵan beıtanys adam biz úshin qam jep, balalarymyz ben nemerelerimizdiń oqýyna eń qajet syılyqtar daıyndady. Qýanyshymda shek joq, – deıdi Q.Músirepov atyndaǵy orta mekteptiń oqýshysy Rústem Jandostyń ájesi Sársenkúl Aqtóreeva.
Jıynda «Nazarbaev zııatkerlik mektepteri» derbes bilim berý uıymynyń basqarma tóraıymy Kúlásh Shámshıdınova osynshama qıyndyqtyrǵa qaramastan elimiz bilim berý salasyna qoldaý kórsetip jatqan kezde ómirdiń óz arnasymen jalǵasatynyn aıryqsha atap ótti.
– Biz balalardyń oqýǵa shabyttanyp, mektepke asyqqandaryna, ata-analardyń balalary men nemereleriniń bilim alýyn baǵalaıtyndaryna kýá bolyp qaıttyq. О́rgebas jáne Jeńis aýyldaryndaǵy mekteptermen yntymaqtastyqty qoldaýdy jalǵastyratyn bolamyz, – dedi Kúlásh Noǵataıqyzy.
Túrkistan oblysy