Elordada jylý keshenderi, turǵyn úı-kommýnaldyq sharýashylyq, bilim, mádenıet jáne densaýlyq saqtaý nysandaryn jylý berý maýsymyna daıyndaý bekitilgen jospar boıynsha jalǵasýda, dep habarlaıdy ákimdiktiń resmı saıty. Bul týraly brıfıngte Nur-Sultan qalalyq otyn-energetıkalyq kesheni jáne kommýnaldyq sharýashylyq basqarmasy basshysynyń orynbasary Baǵdat Baısadyqov málimdedi, - dep habarlaıdy Egemen.kz.
Onyń aıtýynsha, qaladaǵy jylý elektr stansııalaryndaǵy jóndeý jumystary 85 paıyzǵa aıaqtalǵan. JEO-1 daıyndyǵy 80% dep baǵalanady.
«Nysanda jumys jalǵasýda. №4 sý jylytý qazandyǵy, №3 týrbogenerator, qazandyq-týrbınalyq sehtyń qosalqy jabdyqtary, otyn-kólik, hımııa jáne elektr jabdyqtaryna arnalǵan qondyrǵylar kúrdeli jóndeýden ótýde», – dedi Baǵdat Baısadyqov.
JEO-2 80% paıdalanýǵa daıyn. «Astana energııa» aýdandyq qazandyqtarynyń daıyndyǵy 95%. Stansııalar standartty 20 táýliktik janarmaı qoryn jınady.
Kómir qory 427 076 tonna, onyń ishinde JEO-1 –103 4999 tonna (belgilengen norma – 42 424 tonna); JEO-2 – 323,577 tonna (belgilengen norma – 203 660 tonna) mólsherinde.
«Ortalyqtandyrylǵan jylý júıesindegi jylý jelileriniń qol jetimdiligi 94%-dy quraıdy. Jalpy uzyndyǵy 1150 metr magıstraldyq jylý jelilerine kúrdeli jóndeý júrgizilýde. Jalpy uzyndyǵy 4700 metr bolatyn jylý taratý jelilerine aǵymdaǵy jóndeý júrgizilýde. Jylý oqshaýlaýdy qamtamasyz etetin 966 sharshy metr jelini qalpyna keltirý boıynsha jumystar aıaqtaldy», – dedi basqarma basshysynyń orynbasary.
Qaladaǵy elektr jelileriniń qol jetimdiligi – 71%, sýmen jabdyqtaý jáne káriz jelileri – 80%-dy quraıdy.
«Internasıonalnyı, Mıchýrıno, Jeleznodorojnyı, Promyshlennyı, Ońtústik-Shyǵys, Kóktal, Avtomatıka turǵyn alaptarynda 2,4 km sý qubyrlary aýystyrylyp, 47 km sý qubyrlary hlorlandy.
Sýmen jabdyqtaý jelilerinde 47 órt gıdranty, dıametri 50-den 500 mm-ge deıingi 53 klapan jóndelip, ornatyldy. Drenaj júıesine keler bolsaq, 1,2 km káriz jelileri aýystyryldy, 31 km káriz jelileri jýylyp, 970 qudyq jóndeldi», – dep túıindedi ókiletti organ basshysynyń orynbasary.
Kóppáterli turǵyn úı qorynyń daıyndyǵy 93% dep baǵalanady. Atap aıtqanda, 2671 úıdiń 2476-sy daıyn.
Densaýlyq saqtaý nysandarynyń 97%-y daıyn, bilim berý – 99%, mádenıet – 86%.
Halyq úshin kómir qory da qamtamasyz etilgen. Qazirgi ýaqytta janarmaıdyń jalpy kólemi 17 462 tonnany quraıdy. 1-25 tamyz aralyǵynda qalaǵa 19 570 tonna kómir jetkizildi. Turǵyndar kómir qory men shekti baǵasy týraly aqparatty 109 senim telefony arqyly bile alady.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.