Tórt jerlesimiz aıqasady

Asyljan Baqytjanuly men Artem Reznıkov Almatyda irge­tasy qalanǵan «Alash Praıd» klý­bynyń músheleri. Ekeýi de biraz ýaqyttan beri óreli ónerimen kóz­ge túsip júr. «Saq» degen laqap atpen oktagonǵa shyǵyp júrgen 30 jastaǵy qandasymyz Alataý baý­raıynda dúnıege keldi. Asyljan buryndary taekvondomen shuǵyldandy. Aralas jekpe-jekpen aınalysqanyna bes jyldan asty. Sol ýaqyt aralyǵynda 11 kezdesý ótkizip, tek bireýinde ǵana utyldy. 2018 jyldyń mamyr aıynda Baqyt­januly reseılik Músilim Ma­gomedovke ese jibergeni esimiz­de. Sońǵy úsh básekeni Sankt-Pe­terbýrg, Groznyı jáne Alma­ty qalalarynda ótkizip, Vası­lıı Babıch, Alekseı Stoıan jáne Da­nıel Toledo syndy sań­laq­tarǵa san soqtyrdy. Qazaq sport­­shysy óziniń 10 jeńisiniń segi­zinde qarsylastaryn esinen tandyrdy.

Máskeýde Asyljan reseılik Alekseı Býtorınmen aıqasady. 34 jastaǵy Sankt-Peterbýrg qala­synyń týmasy kezinde taıboks, kıkboks jáne ýshý-sandamen shuǵyldanǵan. 2009 jyldan beri aralas jekpe-jekten 19 kezdesý ótkizip, 15 ret jeńis toıyn toılady. 14 básekeni merziminen buryn aıaqtady. Jar­tylaı aýyr salmaqtyń (93,0 kılo) reıtınginde qos sportshy qatar tur. Úzdikter tiziminde Býto­rın úshinshi oryndy ıelense, Ba­qytjanuly tórtinshi satyǵa jaıǵasty.

– Bul óte shıelenisti báseke bolatyny sózsiz. Sebebi, Asyl­jan da, Alekseı de tik turyp aı­qasý­dyń sheberi. Baıqap qaras­ańyzdar, olardyń sońǵy sekýnd­tarǵa deıin aıqasqan sátte­ri sırek. Qos sportshy da óz bá­se­ke­lerin merziminen buryn aıaq­tap júr. Olaı bolsa, Más­keý­de biz naǵyz jan alysyp, jan be­­ris­ken aıqastyń kýásy bolamyz, – deıdi «Alash Praıd» klý­bynyń prezıdenti Danııar Qas­qaraýov.

Jeńil salmaqtaǵy (70,4 kı­lo) Artem Reznıkov Shyǵys Qazaqstan oblysynyń Rıdder qalasynda týyp-ósti. Jasy 28-de. 2011 jyldan beri osy sport túrine myqtap den qoıdy. Barlyǵy 27 márte aıqas alańyna shyqqan ol 21 ret mereıi ústem boldy. 17 básekede aıqyn ba­symdyq tanytty. Sońǵy úsh jylda jeti kezdesý ótkizgen Reznıkov solardyń barlyǵyn óz paı­dasyna sheshti. ASA reıtın­gin­de Artem altynshy orynda tur.

Reseı astanasynda Artem karate men jaýyngerlik sambony erkin meńgergen cheshenstandyq Iýsýf Raısovpen kúsh synasady. Groznyıdaǵy «Ahmad» klýbynda jattyǵatyn 28 jastaǵy sportshy 17 básekeniń tek bireýinde ǵana utyldy. Osydan tórt jyl buryn Raısov óziniń otandasy Marat Balaevqa upaı sanymen ese jibergen edi. Qalǵan kezdesýlerde onyń myqtylyǵy esh kúmán týǵyzǵan joq. 10 kezdesýdi ol merziminen buryn aıaqtady. Úzdikter tiziminde Iýsýf ekinshi orynǵa taban tiredi.

– Bul meniń kópten kútken jekpe-jegim. Sol sebepti de aıtýly jarysqa tyńǵylyqty daıarlandym. Sóz joq, Iýsýf Raısov óte myqty sportshy. Biraq men barymdy salamyn. Báseke taǵ­dyryn sheshýdi tóreshilerdiń quzyryna qaldyrmaı, qarsy­lasymdy aıqyn utýǵa tyrysamyn, – dep Artem aldaǵy josparymen bólisti.

Sol keshte Nurbergen Shári­pov pen Georgıı Kıchıgın de óz ónerlerin ortaǵa salady degen aqparat bar. Asa jeńil salmaqta kúsh synasyp júrgen Atyraýdyń arlany sporttyń bul túrin 2014 jyldan beri serik etýde. Sol aralyqta 11 márte aıqas alańyna shyǵyp, 9 ret basymdyq tanytty. Tórt kezdesýdi merziminen buryn aıaqtady. Ol Samara MMA Federation, Titan FC jáne TKFC dodalarynda baq synady. Sońǵy jekpe-jegin byltyrǵy jyldyń qyrkúıek aıynda ázerbaıjandyq Kenan Jafarlıge qarsy ótkizip, upaı sanymen jeńiske jetti. Bul – Nurbergenniń ASA-daǵy alǵashqy básekesi. Al Georgıı Kıchıgın Re­seıde týyp-ósip, Qazaq­stanǵa qonys aýdarǵan sport­shy. Ol 25 kez­desýdiń 15-in óz paıdasyna sheshti.

Máskeýdegi ASA 111 týr­nı­riniń basty jekpe-jegi jeńil salmaqtaǵy (70,4 kılo) cheshen­standyq Abdýl-Azız Abdýl­vahabov pen ombylyq Aleksandr Sarnavskıı arasynda ótedi. Groznyıdyń týmasy kezinde osy uıymnyń chempıony bolǵan. О́ziniń 19 kezdesýiniń tek ekeýinde ǵana jeńilis tapty. Bul jarysta qazaqstandyqtar Sar­navskııge jankúıer bolatyny sózsiz. Sebebi, 31 jastaǵy aıtýly sportshy bizdiń elde týyp-ósti. Anyqtap aıtsaq, ol Soltústik Qazaqstan oblysynda dúnıege keldi. Aıqas alańyna 44 márte shyqqan Aleksandr 37 ret jeńiske jetti.