Berlın polısııasy jeksenbi kúni «antıkoronavırýstyq» aksııaǵa shyqqan 300-ge jýyq adamdy jaýapqa tartty. Olar belgilengen sanıtarlyq erejelerdi buzyp, áleýmettik qashyqtyqty saqtamaı, qoǵamdyq orynda maska taqpady dep aıyptalýda. Mundaı koronavırýs tyıymdaryna qarsy aksııalar Eýropanyń basqa da qalalarynda júrip jatyr.
Resmı aqparatqa súıensek, jeksenbi kúni Germanııa astanasynda koronavırýsqa qatysty tyıymdarǵa qarsy ekenin bildirmekke 38 myń azamat alańǵa shyqqan. Narazylardyń biri «Biz myna jerge saqtyqtyń mańyzdy ekenin aıtýǵa shyqtyq. Alaıda koronavırýs qasiret bolsa da, bizdiń bostandyǵymyz shektelmeýi kerek», dedi.
Úkimet birneshe aı buryn jeńildetilgen karantın saldarynan qaıta órshigen vırýsty toqtatý maqsatynda qatań karantın jarııalaǵan bolatyn. Bul eýropalyqtardyń narazylyǵyn týdyrdy. Londonda myńǵa jýyq halyq kóshege shyǵyp «medısınalyq tıranııaǵa» núkte qoıýdy talap etti.
300-ge jaqyn Parıj turǵyny da úkimettiń jańa erejelerine qarsylyǵyn bildirip, qoǵamdyq oryndarda medısınalyq maska taǵý talabyn joıýdy talap etti. «Medısınalyq shekteýlerden sharshaǵanymyzdy aıtýǵa jınaldyq. Biz qala turǵyny retinde úkimetke bostandyǵymyzdyń shektelgenin jetkizgimiz keledi», deıdi jınalǵandar. «О́tirikti toqtatyńdar!» degen plakattarmen shyqqan parıjdikterdi quqyq qorǵaý organdarynyń qyzmetkerleri qorshap, maska taqpaǵany úshin 135 eýro kóleminde aıyppul saldy. Shveısarııadaǵy Sıýrıh qalasynda da myńǵa jýyq adam narazylyq bildirdi.
Mıtıngterdiń negizgi sebebi Germanııa kansleri Angela Merkel koronavırýsqa qarsy kúrestiń qatań sharalaryn jarııalaýymen baılanysty. Kansler mundaı shara qoldanýǵa eldegi naýqastar sanynyń kúrt ósýi májbúrledi deıdi. Osyǵan oraı, juma kúni jańa ereje qabyldandy. Endi kóshede medısınalyq maska taqpaǵan azamat 50 eýro kóleminde aıyppul tóleýi tıis.