Búgin Nıý-Iorkte tennısshilerdiń "Úlken dýlyǵa" sanatyna jatatyn jarystardyń biri – AQSh-tyń ashyq birinshiligi bastaldy. Bul joly osy týrnırdiń júlde qory 53 400 000 dollardy qurap otyr, - dep habarlaıdy Egemen.kz.
US Open dodasynda Qazaqstannnyń bes tennısshisi óner kórsetýde. Atap aıtsaq, álemniń 17 raketkasy Elena Rybakına WTA tiziminde 107 orynda turǵan ýkraınalyq Katarına Zavaskaıamen kezdesti. Iýlııa Pýtınsevaǵa (33 raketka) da jerebe jeńil tústi. Tusaýkeser kezdesýinde ol esimi kópshlikke beımálim amerıkalyq arý Megan Montgomerıden (597 raketka) emtıhan aldy. Búgin Zarına Dıas AQSh-tyń taǵy bir ókili Bernarda Peramen sheberlik baıqasady. Bul qos tennısshiniń deńgeıleri shamalas. Bul kúnderi Zarına dúnıejúzilik reıtıngte 66 orynǵa jaıǵassa, Bernarda otandasymyzdan bes saty joǵary tur.
Al erler dodasynda álemniń 51 raketkasy Aleksandr Býblık ATR reıtınginde ózinen alty saty joǵary turǵan ulybrıtanııalyq Kaıl Edmýndpen kúsh synasssa, Mıhaıl Kýkýshkın (90 raketka) majarstandyq Attıla Balashpen (76 raketka) kezdesti.