Jańa 2020-2021 oqý jylynda 3,3 mln qazaqstandyq oqýshy, 466 myń kolledj stýdenti jáne 600 myńnan astam joǵary oqý oryndarynyń stýdenti bilim alady. Sanıtarlyq dárigerlerdiń talaptaryna sáıkes karantındik shekteýler jaǵdaıynda jańa oqý jyly epıdemıologııalyq jaǵdaıǵa baılanysty ártúrli formatta bastalady. Bul týraly Egemen.kz mınıstrliktiń baspasóz qyzmetine silteme jasap habarlaıdy.
Jańa oqý jylynda birinshi synypqa 352 091 oqýshy qabyldandy, olardyń shamamen 75%-y – 6 jasqa tolǵan búldirshinder. Degenmen, ata-analardyń sheshimi boıynsha kúntizbelik jyldyń sońyna deıin alty jasqa tolatyn 11 myńǵa jýyq bala mektep oqýshysy atandy.
Balalardyń jas erekshelikteri men ata-analardyń tilekteri eskerildi, mektepterde sanıtarlyq talaptardy qatań saqtaı otyryp, 1-4 synyp oqýshylary úshin kezekshi synyptar jumys isteı bastady: bir synypta 15 oqýshydan artyq emes.
Jańa oqý jylynda bastaýysh synyptarda bir mıllıonnan astam bala oqıdy, olardyń 60%-y ata-analarynyń nemese zańdy ókilderiniń ótinishteri boıynsha mektepterde, kezekshi synyptarda stanıtarlyq talaptardy qatań saqtaı otyryp oqýdy bastady.
Aıta keteıik, elimizde 7 myńnan astam mektep jumys isteıdi, olardyń 3 myńǵa jýyǵynda 1-11 synyp oqýshylary dástúrli formatta oqýdy bastady. Negizinen, bul shalǵaıdaǵy shaǵyn jınaqtalǵan mektepter, olardyń árqaısysynda 180-nen astam bala bar. Tıisti sheshimdi sanıtarlyq dárigerler qabyldady.
Shamamen 2,6 mln oqýshy jańa oqý jylyn qashyqtan oqytý formatynda bastady. Olar otandyq bilim berý platformalaryn paıdalana otyryp, qashyqtan oqıtyn bolady. "Balapan" jáne "El Arna" respýblıkalyq telearnalary pedagogterdiń tilekteri boıynsha qosymsha qural retinde paıdalanylatyn telesabaqtardy taratatyn bolady.
Bıyl jańartylǵan bilim berý mazmunyna tolyq kóshý aıaqtalǵanyn aıta ketken jón.
Búgin elimiz boıynsha jańa 32 mektep ashyldy, jyl sońyna deıin taǵy 77 bilim berý uıymy paıdalanýǵa beriledi. Jergilikti atqarýshy organdar oqýshylardy qashyqtan oqytýdy uıymdastyrý úshin olarǵa mektep kompıýterleri men roýterlerdi ýaqytsha paıdalanýǵa berdi.
Jańa oqý jylynda mektepterde 10 258 jas maman jumysyn bastady.