О́rt sóndirýshiler kelgenge deıin jedel járdem brıgadasy kólikjaı ıesin aýrýhanaǵa alyp ketti. Bul týraly Ravlodarnews.kz-ke silteme jasaı otyryp Egemen.kz habarlaıdy.
Oblystyq TJD baspasóz qyzmetiniń málimetinshe, ótken táýlikte ortalyq ónerkásiptik aımaqta ornalasqan "Lıteıshık" kooperatıvtik qoǵamyndaǵy avtokólik garajyndaǵy órt týraly habarlama "101" pýltine keshe saǵat 15:25-te kelip túsken.
– Betonnan turǵyzylǵan garajdyń ishinde on alty sharshy metr aýmaqta qoldanysta bolǵan tórt avtoshına men aǵash sóreler janyp ketti. 1978 jyly týǵan er adam №1 qalalyq aýrýhananyń jansaqtaý bólimine úshinshi dárejeli kúıik dıagnozymen jetkizildi. Jaǵdaıy aýyr dep baǵalanady. Oqıǵa ornynda №1 mamandandyrylǵan órt sóndirý bóliminiń sarbazdary syıymdylyǵy alpys lıtr janar-jaǵar maı quıylǵan kanıstrany evakýasııalady, – deıdi departamentte.
Tilsiz jaý saǵat 16:00-de aýyzdyqtap, alty mınýttan keıin tolyǵymen sóndirildi. TJD órt sóndirý jáne avarııalyq-qutqarý jumystary qyzmeti №1 mamandandyrylǵan órt sóndirý bóliminiń toǵyz qyzmetkeri men eki avtosısterna jumys istedi.Qazirgi ýaqytta órttiń sebepteri men keltirilgen shyǵyn anyqtalyp jatyr.