Almatydaǵy Ál-Farabı dańǵylynda bolǵan ólimmen aıaqtalǵan jol-kólik oqıǵasy boıynsha eki jábirlenýshi tarap kináli Aleksandr Pakty keshirgenin málimdedi, dep habarlaıdy Egemen.kz.
Sot otyrysynda qaza tapqan qyzdyń anasy Baqytgúl Joldasova men marqum júrgizýshiniń ápkesi Lıazzat Tilemisova aıyptalýshyǵa qatysty eshqandaı talaptarynyń joq ekenin aıtty.
Lıazzat Tilemisovanyń sózinshe, keltirilgen materıaldyq jáne moraldyq shyǵyn tolyq ótelgen. О́z kezeginde Baqytgúl Joldasova da aıyptalýshymen tatýlasqanyn málimdedi.
«Ol istegen qylmysy úshin ókinetinin jetkizip, keshirim surady. Materıaldyq jáne moraldyq shyǵyndy tolyq ótedi. Meniń de, týystarymnyń da oǵan qoıatyn talabymyz joq. Biz óz erkimizben tatýlastyq», dedi Baqytgúl Joldasova.
Sondaı-aq ol buǵan deıin óz múddesin qorǵaǵan advokat Meıirman Shekeevtiń qyzmetinen bas tartqanyn jetkizdi. Taraptar marqumnyń týystary Aleksandr Pakty tolyq keshirgenin aıtyp, oǵan bas bostandyǵyn aıyrýdan ózge jeńil jaza taǵaıyndaýdy da qoldaıtynyn atap ótti. Al jol apatynan qaza tapqan úshinshi adam – Tomırıs Qydyrbekovanyń týystarynyń ustanymy 4 maýsymǵa belgilengen kelesi sot otyrysynda qaralady.
Aıta keteıik, buǵan deıingi sot otyrysynda aıyptalýshy Aleksandr Pak óz kinásin tolyq moıyndap, keshirim suraǵan bolatyn.