Joldaýdaǵy árbir tyń bastama júzege asyrylýymen de qundy. Túrkistan oblysy agrarlyq salasy jaqsy damyǵan óńirlerdiń biri bolǵandyqtan, Memleket basshysy Qasym-Jomart Toqaevtyń Úkimetke bıznespen birlesip, aldaǵy 5 jylǵa arnalǵan agroónerkásip keshenin damytýdyń jańa sapaly ulttyq jobasyn ázirleýdi tapsyrǵany bólekteý áser etkenin jasyrmaımyz. Ulttyq jobada sharýalarǵa tıimdi máseleler qamtylady degen úmit mol.
Búgingi tańda aýyl sharýashylyǵy ónimderin óndirýshilerge jan-jaqty qoldaý kórsetilip jatqany málim. Sonyń biri – sýbsıdııalaý, biraq ol kómektiń keshiktirilmeı berilgeni sharýalar úshin mańyzdy bolyp otyr. Sýbsıdııa aı saıyn berilse, tıimdiligi de artady. Sondaı-aq aýyl sharýashylyǵy ónimderin qaıta óńdeıtin kásiporyndarǵa qarjylaı kómek kórsetilse. Bir ǵana mysal, Ordabasy aýdanynda Prezıdenttiń tapsyrmasymen júzege asyrylyp jatqan «Egistikten sórege deıin» jobasy óz tıimdiligin kórsetip otyr. Joba aıasynda «Bórte Mılka» JShS jeke 4 sharýashylyqpen birige SPK quryp, Jeńis aýylyna sút jınaıtyn konteıner ornatqan bolatyn. Elimizdegi eń iri sút fermasy bar kompanııanyń biri sanalatyn «Bórte Mılka» óz zaýytynda kúnine nebári 10 tonna sút óndiredi eken. Jalpy kásiporyn táýligine 50 tonna ónimdi tereń óńdeýge qaýqarly. Bul oraıda aınalymǵa qajet qarjynyń bolmaýy óz áserin tıgizýde. Sútti jınaýǵa qarjy jetkilikti bolsa, 20-25 tonna ónimdi tereń óńdeýge múmkindik týady. Sondaı-aq ónim túrlerin de 2-3 ese kóbeıtýge, qosymsha jumys oryndaryn ashýǵa bolar edi. Iаǵnı Joldaýda aıtylǵandaı naryqty áleýmettik mańyzy bar azyq-túlik ónimderimen tolyq qamtamasyz etýge, mıllıondaǵan aýyl turǵyndarynyń tabysyn arttyrýǵa múmkindik jasalady. Bıyl álemdi ábigerge salǵan pandemııa bizdiń óńirde ónim ótkizý, eksporttaý máselesine keri áserin tıgizdi. Qaıta óńdeý kásiporyndaryna qoldaý kórsetilse, sharýalar ónimderin ótkizý máselesine bas aýyrtpas edi. Iаǵnı daıyndaý, qabyldaý pýnktteri búginde qarjylaı qoldaýǵa muqtaj.
Prezıdentke tikeleı qarasty Básekelestikti qorǵaý jáne damytý jónindegi agenttik qurý jónindegi Memleket basshysynyń tapsyrmasy da kásipkerler tarapynan qoldaý tabary sózsiz. Sondaı-aq jańadan qurylýy tıis strategııalyq josparlaý agenttigi josparlaýdy tómennen bastasa degen usynysymyz da joq emes. Joldaýda memlekettik baqylaýǵa balama qoǵamdyq baqylaý ınstıtýtyn qoldaı otyryp, tıisti quqyqtyq negiz qalyptastyrý qajettigi aıtyldy. Qoǵamdyq baqylaý týraly zańdy ázirlep, qabyldaýǵa tapsyrma berilýi de, memleketten bólingen qomaqty qarjylardyń naqty adreske jetetinine kúmándana qaraıtyn sharýalardy qýantyp otyr.
Sháripbek JAMALBEKULY,
«Túrkistan oblysy Azamattyq Alıansy» zańdy tulǵalar qaýymdastyǵy qoǵamdyq birlestiginiń prezıdenti