Fýtboldan Qazaqstan ulttyq quramasy ÝEFA Ulttar lıgasynyń alǵashqy matchynda Lıtva quramasynan 2:0 esebimen basym tústi. Goldardyń avtorlary – Bahtıer Zaınýtdınov pen Islambek Qýat.
Teledıdardan bolǵan oıyndy sýrettep qaıtemiz, kópshiligińiz tikeleı efırden kórip aldyńyzdar dep oılaımyn. Sondyqtan bul joly tek túrtip alǵanymyzdy jáne oıyn statıstıkasyn nazarlaryńyzǵa usynyp otyrmyz.
– Buryn quramany «Astana» fýtbolshylarynsyz elestetý múmkin emes edi. Tipti, qaıbir jyldary negizgi quramǵa 7-8 oıynshy elordalyq ujymnan shyǵatyn edi. Búgin Persýhtan basqa astanalyqtardy kórgenimiz joq. Nátıjesinde bir jyl taǵatsyzdana kútken jeńisimizge qol jetkizdik.
– Bul kezdesýdiń úzdik oıynshysy Baýyrjan Islamhan dep tanyldy. Maǵan salsa, úzdikter qataryna sol qaptaldaǵy qorǵaýshy Nuráli Álipti qosar edim. 20 jasar aqtaýlyq aıaqdop sheberi kádimgideı alańda senimdi oınady. Arasynda shabýylǵa aralasyp, bir-eki fýtbolshyny da aldap ótip júrdi. О́z mindetin abyroımen atqaryp, Lıtva quramasynyń shabýylshylaryn tyrp etkizbedi.
– Nurali Álipten bólek, bizge jıen bolyp keletin (sheshesi qazaq) Marat Bystrov, Iаn Vorogovskıı, Gafýrjan Súıimbaevtyń oıyndaryna joǵary baǵa berýge bolady.
– Birinshi taımda gol soǵyp alǵanymyz qandaı jaqsy boldy. Áıtpese, lıtvalyqtar oıynnyń 46-70 mınýttarynda gol bolady-aý degen alty birdeı qaýipti soqqy jasady. Birde qaqpadan sál ǵana qıys ketse, birde qorǵaýshylar óz mindetterin abyroımen atqara bildi. Úsh ret «Qaırat» qaqpashysy Stas Pokatılov «seıv» jasady.
– 82 mınýtta oıynǵa aralasqan Islambek Qýat araǵa 3 mınýt salyp esepti eseledi. Gol soqqanǵa deıin Qýat bir ǵana soqqy jasaǵan edi. Ekinshi soqqysy golǵa aınalyp, qaqpanyń «toǵyzdyǵynan» kirdi.
– Quramynda qanshama myqtylar jınalǵanymen, bapkerdiń qurǵan taktıkasy «shıki» bolsa, onda jeńisti umyta berýge bolady. Qazaqstan quramasynyń bas jattyqtyrýshysy ekinshi taımda eki oıynshyny der kezinde, dál ýaqytynda almastyrdy. Abat Aıymbetov birneshe shabýyl jasap, qorǵaýshylar men qaqpashyny ábigerge túsirse, Islambek Qýat ekinshi goldyń avtory atandy.
– Qazaqstan quramasy 3-4-3 júıesi boıynsha alańǵa shyqty. Shabýyl ótinde júrgen Zaınýtdınov pen Islamhan óz klýbtarynda jartylaı qorǵaýshy, Súıimbaev jartylaı qorǵaýshy ne qorǵaýshy qyzmetin atqarady.
– Lıtva quramasy sońǵy 10 oıynda 1 ret jeńiske jetip, 2 ret teń túsken. Dop aıyrmashylyǵy – 5:25. Olar sońǵy ret (19.11.2019 j.) Jańa Zelandııa quramasyn (joldastyq kezdesý) 1:0 esebimen jeńgen.
– Qazaqstan ulttyq quramasy sońǵy 10 oıynda 3 ret jeńiske jetip, 1 ret teń túsken. Dop aıyrmashylyǵy – 12:17. Jerlesterimiz sońǵy ret (16.11.2019 j.) Eýro-2020 irikteý aıasynda ótken matchta túzde San-Marıno fýtbolshylarynan 3:1 esebimen basym tústi.
– Eki qurama ózara bir ret kezdesip (joldastyq kezdesý), 1:1 esebimen teń tarqasqan.
– Qazaqstan quramasy ÝEFA Ulttar lıgasy S sebetiniń 4-tobynda myna komandalarmen ózara myqtyny anyqtaıdy: Belarýs, Albanııa jáne Lıtva. Osy jeńisinen keıin Qazaqstan quramasy Albanııa komandasymen 1-2-oryndy bólisip tur. Albandyqtar da týra biz sekildi túzde Belarýs komandasynan 2:0 esebimen basym tústi.
– FIFA reıtıngisinde Qazaqstan ulttyq quramasy – 121, Lıtva quramasy – 132-orynda.
Oıyn statıstıkasy:
Lıtva – Qazaqstan – 0:2 (0:1)
Gol soqqandar: Zaınýtdınov, 5 – 0:1; Qýat, 85 – 0:2.
Dopty ıelik etý – 54% – 46%; soqqy – 16:10; dál soqqy– 3:5; buryshtama – 3:2; ofsaıd – 1:2; oıynshy almastyrý – 3:3; sary qaǵaz – 4:2.
Eskertý (sary qaǵaz): Palıonıs, 22 Mıkolıýnas, 33, Sırgedas, 45+1, Baravıkas, 82 – Malyı, 42, Ábiken, 69.
LITVA:
qaqpashy – Bartkýs;
qorǵaýshylar – Mıkolıýnas, Palıonıs, Gırdvaınıs, Baravıkas (Verbıskas 82), Shımkýs;
jartylaı qorǵaýshylar – Kazlaýskas, Sırgedas (Dapkýs 89), Vorobıovas, Lasıskas;
shabýylshy – Chernyh (Laýkjıamıs 46).
Bas jattyqtyrýshy: V.Ýrbonas.
QAZAQSTAN:
qaqpashy – Pokatılov;
qorǵaýshylar – Marochkın, Malyı, Álip;
jartylaı qorǵaýshylar – Bystrov, Ábiken, Persýh (Qýat 82), Vorogovskıı;
shabýylshylar – Zaınýtdınov (Fedın 30), Islamhan (Aıymbetov 70), Súıimbaev.
Bas jattyqtyrýshy: M.Bılek.