Qazaqstandyq oqýshylar alǵash ret ınformatıkadan Eýropalyq jasóspirimder olımpıadasyna (European Junior Olympiad in Informatics) qatysyp, joǵary nátıje kórsetti. Oı jarystyrǵan oqýshylarymyz Qazaqstan quramasynyń qorjynyna altyn, kúmis jáne qola medal saldy.
2017 jyldan beri turaqty túrde ótkizilip kele jatqan Olımpıadaǵa bıyl 27 memleketten 90-nan asa oqýshy baq synaǵan. Bilim jáne ǵylym mınıstrliginiń aqparatyna súıensek, qazaqstandyq qurama komanda músheleri ulttyq jarystar qorytyndysy boıynsha anyqtalypty. Komandaǵa ınformatıka páni boıynsha respýblıkalyq olımpıada jeńimpazdary men júldegerleri tańdalyp alynǵan.
Osy joly pandemııaǵa baılanysty onlaın rejimde ótken olımpıadanyń qorytyndysy boıynsha Van Lı altyn medal; Taımas Korǵanbaev kúmis medal; Ádil Sultanov pen Ramazan Perdebaı qola medal ıelendi.
Altyn medal qanjyǵalaǵan Van Lı Respýblıkalyq fızıka-matematıka mektebiniń 9-synybynda oqıdy. Ol bizge bergen shaǵyn suhbatynda olımpıada qashyqtan uıymdastyrylǵanymen, jeńiske jetýdiń ońaı bolmaǵanyn aıtty. «Osy jarys týraly mekteptegi ınformatıkadan olımpıadaǵa daıyndaıtyn trener-muǵalimim aıtty. Olımpıada 2 kúnge sozyldy. Úıde otyryp qatystym. Men daryndy balalarǵa arnalǵan jáne fızıka-matematıka baǵytyn tereńdetip oqytatyn mektepte oqımyn, sonda da olımpıadanyń tapsyrmalary men esepteri qıyn boldy. Mektep baǵdarlamasy dep aıta almaımyn. Bir jaqsysy tapsyrmalardyń qorytyndysy birden shyǵyp otyrady eken», deıdi V.Lı.
Al altyn medal alǵan alǵyr shákirttiń ustazy Temirlan Qaıratuly halyqaralyq jarysqa áýeli respýblıkalyq deńgeıde irikteý ótkizilgenin jetkizdi. «Respýblıkalyq «Daryn» ortalyǵy aldymen el kólemindegi myqtylardy anyqtap aldy. Sodan keıin baryp olardan Qazaqstan quramasy jasaqtalyp, halyqaralyq saıysqa jiberildi. Demek, bul – bizdiń tańdaýly talanttarymyz. Oqýshylarymyz bilim berý júıesi damyǵan shetelderdegi qurdastarymen ıyq tirese alatynyn, ózge eldiń ozat oqýshylarynan oza alatynyn kórsetti. Sonyń ishinde altyn medal alǵan shákirtim Van – óte alǵyr, bárinen buryn asa eńbekqor bala», dedi T.Qaıratuly.
Biz shákirti báıgeden birinshi kelgen muǵalimnen qarapaıym mektep oqýshylarynyń osyndaı nátıje kórsetýi úshin ne isteý keregin suradyq. Sonda ol: «Negizi qatardaǵy orta mektepterdiń oqýshylary da osal emes. Tek mektep ákimshiliginde osyǵan arnaıy kóńil bólinýi kerek. Máselen, men ınformatıka páninen sabaq bermeımin, tek qana oqýshylardy ınformatıkadan olımpıadaǵa daıyndaımyn. Kórdińiz be, mektep bul baǵytty maqsatty túrde qolǵa alǵan. Iаǵnı olımpıadaǵa oqýshylardy daıyndaıtyn mamanǵa bólek shtat bar», dep jaýap berdi.