Premer-Mınıstr Asqar Mamınniń tóraǵalyǵymen ótken Úkimet otyrysynda 2020 jylǵy qańtar-tamyzdaǵy QR áleýmettik-ekonomıkalyq damý qorytyndysy jáne respýblıkalyq bıýdjettiń atqarylýy qaraldy. Bıyl 8 aıdaǵy elimizdiń ónerkásip salasyndaǵy jumys nátıjeleri týraly ındýstrııa jáne ınfraqurylymdyq damý mınıstri Beıbit Atamqulov baıandady, dep habarlaıdy Premer-Mınıstrdiń baspasóz qyzmeti.
Mınıstr habarlaǵandaı, 8 aıdyń qorytyndysy boıynsha ónerkásip óndirisiniń kólemi 0,4% ósti. Taý-ken óndirý sektorynda tústi kenderdi óndirý quramynda altyn bar kendi óndirýdi artýy esebinen 1,4% ósti. Temir ken óndirý kólemi 0,9% ósti. Kómir ónimderin tutyný kóleminiń artýyna baılanysty ósim 1,2% qurady.
"О́ńdeý ónerkásibinde naqty kólem ındeksi tústi metallýrgııa, farmasevtıka, jeńil ónerkásip, mashına jasaý, hımııa jáne basqa da salalar esebinen 3,3% ósti. Tústi metallýrgııada óndiris kólemi tazartylǵan altyn óndirý kólemin 3%, bastapqy alıýmınııdi 1%, quıma altyn 30%, túıirshikterdegi kúmis 28% jáne basqa da kórsetkishterdiń ósýine baılanysty naqty kólem ındeksi 2,7% artty", dedi B. Atamqulov.
Qara metallýrgııada naqty kólem ındeksi 97,8% qurady. Bul kórsetkish bolattyń, relsterdiń, bolat qubyrlardyń, shoıyn óndirisi kóleminiń tómendeýine baılanysty boldy. Hımııa ónerkásibinde óndiris kólemi 3,1% ósti. Bul dezınfeksııalyq quraldar jáne mıneraldy tyńaıtqyshtardyń óndirý kóleminiń ulǵaıýyna baılanysty.
"Mashına jasaý salasy jaqsy nátıje kórsetip, óndiris kólemi 16,3% ósti. Avtokólik quraldary, treılerler jáne jartylaı tirkemeler 51,8%, mashınalar men jabdyqtardy jóndeý jáne ornatý 2,8%, ózge kólik quraldaryn jasaý 101,4%, elektr jabdyqtardy jasaý 0,2% ósti", dedi mınıstr.
Farmasevtıka ónerkásibinde óndiris kólemi 34,1% artty. "SQ-Farmasııa" dıstrıbıýtory arqyly Tegin medısınalyq kómektiń kepildik berilgen kólemi sheńberinde dárilik zattar men medısınalyq buıymdardy jetkizý kólemi ulǵaıtyldy. Jeńil ónerkásipte óndiris 11% ósti. Ol toqyma buıymdary óndirisiniń 7,2% jáne bylǵary ónimderdiń 66,2% ulǵaıýyna baılanysty boldy. Kólik salasynda naqty kólem ındeksi 2020 jyldyń qańtar-tamyz aılarynda 83,9% qurady. Konteınerlerdiń tranzıttik tasymaldarynyń kólemi ótken jyldyń sáıkes kezeńimen salystyrǵanda 37% artyp, 564 myń jıyrma fýnttyq balamany qurady. Vedomstvo basshysy habarlaǵandaı, kóliktiń barlyq túrlerimen júk tasymaldaý kólemi 2,5 mlrd tonnany qurap, 7,5% tómendedi.
"Qurylys salasynda naqty kólem ındeksi 2020 jyldyń qańtar-tamyz aılarynda 106,5% qurady. О́sim qurylys kólemin arttyrý esebinen qamtamasyz etiledi. 16 óńirde oń dınamıka baıqalady", dedi mınıstr.
Turǵyn úı qurylysynda bıyl 8 aıdyń qorytyndysynda 8 mln 100 myń sharshy metr turǵyn úı paıdalanýǵa berildi, bul ótken jyldyń sáıkes kezeńimen salystyrǵanda 106,4%. Búgingi tańda respýblıka boıynsha barlyǵy 71 457 baspana paıdalanýǵa berildi. О́tken jylmen salystyrǵanda, turǵyn úıdi paıdalanýǵa berý kóleminiń artýy 14 óńirde baıqalady.