Bilim jáne ǵylym mınıstri Ashat Aımaǵambetovtiń málimdeýinshe, Memleket basshysy bergen tapsyrmanyń aıasynda oqýlyqtardy ázirleý júıesi tolyǵymen ózgerdi.
Oqýlyqtardy basýǵa qatysty baıandama jasaǵan A.Aımaǵambetov mınıstrliktiń apparat jınalysynda:
«Oqýlyq – sapaly bilim alýdyń mańyzdy quraly. Osy rette oqýlyqtardy shyǵarý tártibi ózgertilip, bul týraly normatıvtik-quqyqtyq aktiler Ádilet mınıstrliginde tirkelip, ózgerister kúshine endi. Budan bylaıǵy oqýlyqtardyń sapasy múldem bólek bolady. Aıtalyq, oqýlyqtardyń formatyna qatysty ortaq talap engizildi. О́zderińiz biletindeı, oqýlyqtardyń bireýi – úlken, bireýi – kishkentaı. 1-synyptyń oqýshylaryna arnalǵan qazirgi oqýlyqtar tym kólemdi bolǵandyqtan, muǵalimder eki balanyń bir partaǵa kitaptaryn syıǵyza almaı qınalatynyn jetkizdi. Oqýlyqtar tek shrıft, dızaın, jalpy bezendirý máselesine ǵana emes, bilim alýshylardyń jas ereksheligine saı ázirlenýi tıis. Sodan keıin keıbir oqýlyqtardaǵy tapsyrmalarda ınternetke siltemeler beriledi. Biraq oqýshylardyń bárinde birdeı ınternet joq ekeni eskerilmegen. Joǵaryda engizilgen ózgeristerde oqýlyqtardyń mazmunynda osyndaı shala tapsyrmalardyń bolmaýyn qarastyryp otyrmyz», dedi.
Al respýblıkalyq ǵylymı-praktıkalyq «Oqýlyq» ortalyǵynyń dırektory Ǵanı Bektaıuly sońǵy birneshe jyldan beri bıyl birinshi ret 3 mln-nan asa oqýshynyń oqýlyqtarmen 10 paıyz qamtamasyz etilgenin aıtty.
«Bul pandemııa jaǵdaıynda oqýshylarǵa jasalǵan memlekettiń qoldaýy dep bilgen jón. Oqýlyqtardy ázirleýdiń jańa tártibine kelsek, kitaptardy saraptamadan ótkizýge psıho-lıngvıstıkalyq jáne kórkem ádebıet turǵysynan tekseristi qostyq. Bul bizdiń mádenıetimizge, qalyptasqan dástúrimizge, dinimizge qaıshy keletin aqparattardy baspaý úshin kerek. Kórkem ádebıet turǵysynan tekseris avtorlyq quqyqty buzýdyń aldyn alý maqsatynda engizildi», dedi Ǵ.Bektaıuly.
Ortalyq basshysynyń baıandaýynsha, oqýlyq avtorlary budan bylaı oqýlyqtardy ázirleý kýrstarynan ótip, sertıfıkat alady. Oqýlyqtardy shyǵarý isimen tek osyndaı sertıfıkaty bar avtorlar ǵana aınalysa alady. Bul talap pen kýrs oqýlyq sarapshylaryna da qatysty bolyp otyr. Sonymen qatar avtorlar men sarapshylar quramynda tek ǵalymdar emes, ádiskerler men bilikti muǵalimder de bolýy tıis. Budan bólek sarapshylarǵa tekseristen ótkiziletin oqýlyqtardyń avtory men baspasy kórsetilmeı beriledi. Bul óz kezeginde ashyqtyq pen ádildiktiń bolýyn qamtamasyz etedi. Baspalarǵa da qatysty birqatar ózgerister bar. №91 buıryqqa sáıkes, endi úlken qatelikter ketken jaǵdaıda baspa oqýlyqtardy tolyǵymen óz qarjysyna qaıta basyp shyǵarady. Sondaı-aq baspalar ózderi basatyn oqýlyqtarǵa baspaishilik saraptama júrgizýge mindetti.