Elorda ákimi Altaı Kólginov Úkimet otyrysynda Nur-Sultanda áleýmettik mańyzy bar azyq-túlik taýarlarynyń baǵasyn turaqtandyrý boıynsha qolǵa alynǵan sharalardy atady, dep habarlaıdy Egemen.kz elorda ákimdigine silteme jasap.
"Birinshi.... "Aınalym tetigi" jobasy jalǵasyn tapty. Saýda jelilerine azyq-túlik satyp alýǵa bólinetin soma 180 mln teńgeden 2,4 mlrd teńgege deıin artty (on úsh eseden astam). Bul 16 ónim túriniń baǵasyn ustap turýǵa múmkindik beredi. Eger buryn jobaǵa saýda jelileriniń 4 obektisi qatyssa, qazir 12-ge deıin kóbeıdi: Magným, Astyqjan, Kenmart, Vkýsmart, A2, Metro, Anvar, Rahmet, Aqmol, Smoll, Artem, Shapaǵat.
Sonymen qatar baǵany bekitý kezeńi bir jylǵa deıin sozyldy. Otandyq taýar óndirýshilermen tikeleı 700 mln teńgeden astam somaǵa 3 forvardtyq kelisimshart jasaldy.
Ekinshi. Turaqtandyrý qory quryldy. "Áleýmettik nan" baǵasyn turaqtandyrý úshin jergilikti bıýdjetten qosymsha 700 mln teńge bólindi. Bul sondaı-aq naýbaıhanalardyń jumysyn qoldaýǵa múmkindik beredi.
Úshinshi. 5 qyrkúıekten bastap, ár demalys kúnderi biz 12 qazanǵa deıin aýylsharýashylyq jármeńkelerin ótkizemiz. О́nimdi 12 óńir alyp keledi. Eki demalys aptasynda naryq baǵasynan tómen baǵamen 1 myń 200 tonnadan astam ónim satyldy.
Tórtinshi. Jeke ınvestısııalardy tartý esebinen qajetti mınıstrliktermen birlesip qalada úsh kóterme-taratý ortalyǵyn salýdy josparlap otyrmyz. Olar ásirese maýsymdyq suranys kezeńinde, áleýmettik mańyzy bar azyq-túlik baǵasyn ustap turýǵa múmkindik beredi", dep qorytyndylady elorda ákimi Altaı Kólginov.