Elordada ekpe salý qarasha aıynyń basyna deıin jalǵasady, dep habarlaıdy Egemen.kz elorda ákimdigine silteme jasap.
Búgin tańda Nur-Sultan qalalyq Qoǵamdyq densaýlyq saqtaý basqarmasynyń basshysy Tımýr Muratov emhanaǵa baryp, tumaýǵa qarsy ekpe saldyrdy. Basqarmasy basshysy ekpeniń maýsymdyq aýrýlardyń órshýi kezindegi mańyzdylyǵyn da atap ótti.
"Vaksınasııa – aýrýdyń aýyr sıpaty men onyń keń taralýyn eskere otyryp, tumaýdan qorǵaýdyń eń qısyndy ádisi. Sonymen qatar, qazir osy kezeń úshin standartty aýrýlardyń (sýyq tııý, tumaý) qozdyrǵyshy bolýy múmkin koronavırýs ınfeksııasy kezeńinde vaksınasııa óte mańyzdy! Barshańyzdy vaksına alýǵa jáne óz densaýlyǵyńyzǵa jaýapty bolýǵa shaqyramyn!" dedi Tımýr Muratov qala turǵyndaryna.
Eske sala keteıik, elordalyq qoǵamdyq densaýlyq saqtaý basqarmasy ekpeniń 110 myń dozasyn satyp alǵan bolatyn. Ol TMKKK paketine kiredi jáne halyqtyń belgili bir toby úshin tegin júrgiziledi. Atap aıtqanda, sozylmaly aýrýlary bar 18 jasqa deıingi balalarǵa, medısına qyzmetkerlerine, júkti áıelderge (júktiliktiń 2-3-shi trımestri), jabyq mekemelerdegi adamdarǵa (balalar úıi, sábıler úıi, mektep ınternaty), múgedekterge (eresekter men sozylmaly aýrýlary bar balalar); 60 jastan asqan qarttarǵa.
Nur-Sultanda vaksınalaý bastalǵannan beri 24,6 myń adam tumaýǵa qarsy ekpe aldy. Olardyń 6300-i balalar, onyń ishinde 211 adam sábıler úılerinde, balalar úılerinde, mektep-ınternattarda, múgedek balalarǵa arnalǵan ınternattarda. Ekpe alǵan eresekter sany 14 myń adamnan asty.