Qazaqstandyq jas ánshi Danelııa Tóleshova AQSh-ta ótip jatqan America' s Got Talent shoýynyń fınalyna joldama aldy, dep habarlaıdy Egemen.kz.
"Danelııa Tóleshova bir táýlik ishinde AQSh kórermenderiniń daýys berý nátıjeleri boıynsha favorıtter qatarynan kórindi. Ol álemdik shoýdyń fınalynda óner kórsetý múmkindigine ıe boldy. Fınalǵa ótý úshin synǵa túsken qatysýshylardyń úshtiginde Danelııamen birge "Golden buzzer"-diń eki ıegeri bar. Olar qazylar alqasynyń arnaıy qoldaýyna ıe boldy. Alaıda kórermender qazaqstandyq ánshi Danelııany qoldady", - dep jazdy Danelııa Tóleshovanyń PR-dırektory Tatıana Sınenko Feısbýktegi paraqshasynda.
Aıta keteıik, America' s Got Talent 15-kezeńiniń fınaly 22 qyrkúıekte NBC telearnasynyń tikeleı efırinde ótedi.
"Osy ýaqyt ishinde meni qoldaǵandaryńyz úshin alǵys bildiremin. Bul sheshýshi apta bolmaq, kóp jumys isteý kerek. Men sizderdiń úmitterińizdi aqtaýǵa tyrysamyn", – dedi Danelııa Tóleshova.