Ekinshi tolqynnyń ekpini kúsheıe bastady

Argentınada 24 saǵat ishinde 429 pasıent ómirmen qoshtasyp, indetten kóz jumǵandar sany 13 482-ge jetken. Jalpy, COVID-19 týdyrǵan derttiń salmaǵyn 540 147 jan sezingen kórinedi. El astanasy Býenos-Aıres turǵyndary arasynda aýrý juqtyrý azaımaı tur. О́tken bir táýlikte 3 700 adamnan aýrý tabylǵan.

Álem boıynsha indet taraýy jóninen aldyńǵy orynnyń birindegi Brazılııada 4 558 068 adam indet tyrnaǵyna ilinip, apta basynda jańadan 13 439 vırýs juqtyrý faktisi tirkelgen. Pandemııa patshalyq qurǵaly Brazılııa 137 272 azamatynan aıyrylǵan. Bul elde bir kúnde COVID-19-dan 377 adam qaıtys boldy.

 * * *

Oslo bıligi koronavırýs taralýy­na baılanysty shekteý sharalaryn qataıtty.

Dagens Nyheter gazeti jarııalaǵan málimette Osloda aýrý kóbeıýine baılanysty qalanyń barlyq tusynda «qyzyl aımaqtar» anyqtalǵan. Bul COVID-19 órship turǵanyn ańǵartady.

Sońǵy úsh aptada Osloda aýrý tirkelý kóbeıip, qala turǵyndaryna saqtyq sharalaryn kúsheıtýge keńes berilgen. Endi oslolyqtar qoǵamdyq kólikterde, saýda oryndarynda, qysqasy áleýmettik qashyqtyqty saq­taý­ǵa múmkin emes jerlerdiń bar­ly­­ǵynda aýzy men murnyn jaýyp, tumshany tastamaýy tıis. Buǵan qosa halyqqa óz úılerinde 10 adamnan asatyn toppen jınalýyna bolmaıtyny qatań eskertilgen.

* * *

Parıjdikter Italııaǵa test tapsyrmaı kirmeıtin boldy. Fransııa EO elderi arasynda KVI taralýy jóninen alańdatarlyq kúıde tur.

Fransýzdardyń test tapsyrmaı Italııa aýmaǵyna kirgizilmeıtini týraly qujatqa Italııa densaýlyq saqtaý mınıstri Roberto Speransa 21 qyrkúıekte qol qoıǵan.

Italııanyń kári qurlyqtaǵy pandemııa áý bastan tyrnaǵyn qatty batyrǵan memleket ekeni barshaǵa aıan. Aýrýhanalarda oryn jetpeı, vırýs juqtyrǵan jandardyń kóshelerde em qabyldaǵany, kóptegen ıtalııalyqtyń ómirmen qoshtasqany belgili. Sondyqtan da alǵashqy soqqydan eseńgirep qalǵan ıtalııalyqtardyń bul qareketin túsinýge bolady. Sáýirdiń sońynan shildeniń basyna deıin aýrý sany azaıyp kelgen Italııada mine, indet qarqyny kúsheıgeni baıqalady. Al qaıtys bolǵandardyń arasynda jastar men orta býyn ókilderiniń kóp bolýy da jurtty alańdatyp otyr.

Fransııadaǵy COVID-19-ǵa qarsy saqtyq sharalarynyń kúsheıgenine qa­ra­mastan, munda da KVI órship b­a­ra­dy. Tek keshegi kúnniń ózinde 5 298 adam aýrý juqtyryp, 827 pasıent aýrýhanalardyń jansaqtaý bólimderinde jatqan kórinedi.

 * * *

London meri Sadık Han astanada shekteý túrlerin qatańdatýdy jarııa­l­ady.

Mer «Aýrýdy aýyzdyqtaıtyn ózge tańdaý joq. Ekinshi tolqynnyń basynan bastap shekteý jarııalaýdyń mańyzy zor. Keıin vırýs beleń alǵanda shekteýdi qatańdatqannan góri qazir bekemdik tanytý el úshin paıdaly» dedi. Ol Borıs Djonson basqaratyn Úkimetke meıramhana, barlardyń ýaqy­tyn shekteý, áleýmettik qashyq­tyq ustaýǵa múmkindik joq oryn­dar­dyń barlyǵynda tumsha tas­tamaý týraly usynysty jetkizetinin má­limdegen.

* * *

Sveriges Radio sanıtarlyq normalardy saqtamaıtyn shvedtikterdiń vırýs taralýyna septesetinin habarlady.

Stokgolm men Geteborgtegi árbir úshinshi meıramhana men barda áleýmettik qashyqtyq qadaǵalan­baı­ty­ny jaıyndaǵy eskertý berilgen. Stok­golmniń qorshaǵan ortany qor­ǵaý departamentiniń basshysy Pter Brodenmark: «Naýryz aıynan beri shek­teý jarııalanǵaly 2 myńnan astam tekserý júrgizildi. Kórsetilgen kem­shi­likterdi joıý barysyn baqylaý úshin júrgizilgen ekinshi tekserýde biz jaǵ­daı­dyń áli ońalmaǵanyn ańdadyq», deıdi. Ol árbir sanıtarlyq normany ustamaıtyn azamattyń aýrý taralýyna kómektesetinine qynjyldy.

Geteborgte tekserý júrgizilgen 900 tamaqtaný ornynyń 300-inde kem­shi­lik­ter anyqtalǵan.