Soltústik Qazaqstan oblysynda "Qarý" jedel-profılaktıkalyq is-sharasy ótýde, onyń aıasynda qarý ıeleriniń myltyqty qaýipsiz saqtaý talaptary tekserildi, dep habarlaıdy Egemen.kz.
Aqjar aýdanyndaǵy Kıev aýylynyń turǵyny qarýyn mal qorasynda saqtap kelgen. Buǵan deıin de ol saqtaý erejelerin buzǵan. Seıfte myltyǵymen birge basqa da bógde zattardy saqtaǵan. Osy ákimshilik quqyq buzýshylyq faktisi boıynsha ÁQBtK 484-babymen hattama toltyrylyp, qarý ýaqytsha saqtaýǵa alynǵan. Biraq qarý saqtaýdaǵy qatań talaptardy ol báribir oryndamaǵan. Sondyqtan osy joly turǵynnyń myltyǵy úsh jylǵa alyndy. Bir jyl ishinde eki quqyq buzýshylyqqa jol bergeni úshin ol qarýdy saqtaý jáne alyp júrý quqyǵynan aıyryldy.
Sondaı-aq polıseıler Aqjar aýdanynda qarýyn avtokóliktiń júk salǵyshyna salyp júrgen kórshi aýdannyń turǵynyn da ákimshilik jaýapkershilikke tartty. Ol Talshyq aýylyna kelip, ańshy myltyǵyn kóligine tastap ketkende aýyldyń mas turǵyny túnde kólikti aıdap ketken. Alysqa uzaı almaı, jol-kólik oqıǵasyn jasap, sheteldik kólikti aıdalaǵa tastap, ózi ketip otyrǵan. Qarý júksalǵyshta jatqan, qaraýsyz qaldyrýdyń saldary qandaı jaǵdaıǵa ákelýi múmkin ekendigin elestetýdiń ózi qıyn.
Jalpy, eki kúnniń ishinde qarýdy saqtaý erejelerin buzýǵa baılanysty ÁQBtK 484-baby boıynsha 10 ákimshilik quqyq buzýshylyq anyqtaldy, sonyń ishinde oblystyń 8 turǵyny qaıta tirkeý merzimderin buzǵan. "Qarý ıeleri qaýipsizdikti saqtaýǵa jaýapkershilikpen qarap, qarýdy tıisinshe saqtaýdy baıypty qabyldaýlary kerek. Durys bolmasa, ıaǵnı durys saqtalmasa ár túrli jaǵdaılarǵa, onyń ishinde apatqa da ákelýi múmkin. Sondyqtan ýchaskelik polısııa ınspektorlary qarýdy saqtaý erejeleri men zańda belgilengen basqa da talaptardyń saqtalýyn qatań baqylaıdy", - deıdi Soltústik Qazaqstan oblysy PD bastyǵynyń birinshi orynbasary, polısııa polkovnıgi Qanat Aıtbaev.