Saýda jáne ıntegrasııa mınıstrligi Ekonomıkalyq ıntegrasııa departamentiniń sarapshylary qazaqstandyq delegasııa quramynda Eýrazııalyq ekonomıkalyq komıssııa alańynda «Temir jol jyljymaly quramynyń qaýipsizdigi týraly», «Joǵary jyldamdyqty temir jol kóliginiń qaýipsizdigi týraly» jáne «Temir jol kóligi ınfraqurylymynyń qaýipsizdigi týraly» Keden odaǵynyń tehnıkalyq reglamentterine ózgerister jobalary boıynsha kelispeýshilikterdi talqylaý jónindegi keńeske qatysty.
Osy tehreglamentter Eýrazııalyq ekonomıkalyq odaq elderindegi temir jol kóliginiń jáne onyń ınfraqurylymynyń, onyń ishinde lokomotıvterdiń, jolaýshylar jáne júk vagondarynyń, temir jol platformalary men stansalarynyń qaýipsizdigi máselelerin retteıdi.
Qujatty ázirleý 4 jyldan astam ýaqyt boıy júrgizilip keledi. О́zgerister jobasynda sáıkestikti rastaýǵa jatatyn jyljymaly quramnyń quramdas bólikteriniń tizbelerine, uǵymdyq apparatqa ózgerister engizý kózdeledi, sáıkestikti rastaý jónindegi jumystardy júrgizý talaptary men rásimderi naqtylanady.
Qujat qoǵamdyq talqylaýdan, memleketishilik kelisý rásimderinen ótti jáne joǵary daıyndyq deńgeıinde.
Qazirgi ýaqytta EAEO-ǵa múshe memleketterdiń aýmaǵynda jyljymaly quramdy jáne (nemese) onyń quramdas bólikterin kedergisiz paıdalanýdy qamtamasyz etýge baǵyttalǵan 3 másele sheshilmegen kúıinde qalyp otyr.
Bul túzetýler vagondardy jańartý kezinde daýly máselelerdi sheshýge, keıinnen vagondardyń qyzmet etý merzimin uzartýǵa, qosalqy bólshekterdi ákelýge, sáıkestikti baǵalaýdan ótýge múmkindik beredi. Mysaly, kúrdeli jóndeýden ótken vagondardyń Reseı Federasııasyna kirý múmkindigi bóliginde.
Qazaqstan, armıan, belarýs jáne qyrǵyz taraptary joǵaryda atalǵan usynystardy kelisti, al Reseı Federasııasy qarsy.
Osyǵan baılanysty, taraptardyń ózara tıimdi sheshimderdi izdeý boıynsha konsýltasııalary jalǵasýda.