Densaýlyq saqtaý mınıstri Alekseı Soı koronavırýstyń yqtımal ekinshi tolqynyna daıyndyq týraly aıtty, dep habarlaıdy Egemen.kz.
"Osy jyldyń qazan aıynyń sońyna deıin 11 oblys ortalyǵy men Almaty qalasynda 3 100 tósektik 13 modýldi juqpaly aýrýlar aýrýhanasyn salýdy aıaqtaý, sondaı-aq eki nysandy jóndeý josparlanýda. Qazirgi ýaqytta ınfeksııalyq jáne provızorlyq stasıonarlarda 3 379 О́JJ apparaty bar, qosymsha 2 619 birlik, onyń ishinde 1 500 otandyq óndiris apparaty satyp alynady", - dedi Alekseı Soı Úkimet otyrysynda.
Onyń aıtýynsha, qazir elimizde 21 myńnan astam tósek ottegimen qamtamasyz etilgen.
"Qazan aıynyń sońyna deıin qosymsha 9 myńnan astam tósek-oryn qamtamasyz etiledi. Aýdandyq aýrýhanalardy qosymsha jaraqtandyrý úshin 11 óńirde qolda bar 132-ge qosymsha otandyq óndiristiń 53 rentgen-apparaty satyp alynady. Jedel medısınalyq kómek qyzmetin 2020 jyly 1 167 sanıtarlyq avtokólikpen jabdyqtaý josparlanýda, onyń ishinde 360 - y qosymsha satyp alynady", - dep atap ótti mınıstr.