Senat Tóraǵasy, Álemdik jáne dástúrli dinder lıderleri Sezi Hatshylyǵynyń basshysy Máýlen Áshimbaev Qazaqstannyń Bas ravvıni Eshaıa Kogendi qabyldady, dep habarlaıdy Egemen.kz Senattyń baspasóz qyzmetine silteme jasap.
Senat Tóraǵasy Qazaqstanda beıbitshilik pen konfessııaaralyq kelisimdi qamtamasyz etýde Iýdeı qaýymy memlekettiń mańyzdy seriktesi ekenin jáne atalǵan din ókilderi elimizde mádenıet pen rýhanııattyń damýyna úlken úles qosyp otyrǵanyn atap ótti.
Sonymen qatar Máýlen Áshimbaev Bas ravvındi jáne Qazaqstandaǵy barsha evreı qaýymyn Sýkkot merekesimen quttyqtady. Senat Tóraǵasy ejelden kele jatqan bul meıram senim pen birlikti arttyratynyn jáne izgilikti dáripteıtinin tilge tıek etti.
Kezdesý barysynda taraptar osyǵan deıin ótken Álemdik jáne dástúrli dinder lıderleri Sezderiniń qorytyndylaryn iske asyrý jumystaryna qatysty pikir almasyp, dinaralyq dıalogty odan ári nyǵaıtý máselelerin talqylady.
Máýlen Áshimbaev sezdiń halyqaralyq deńgeıde moıyndalǵanyn jáne jahandyq órkenıetaralyq dıalogtyń mańyzdy tetigine aınalǵanyn aıtty.