Karantın tártibi qaýiptiń aldyn alady

Nur-Sultan qalasynyń bas mem­lekettik sanıtarlyq dárigeri Janna Pirálıeva shahar halqyn sanıtarlyq talaptaryn saqtaýǵa shaqyryp, karantın tártibin buzýshylarǵa eskertý jasady.

«Kásipkerlik sýbektileri arasynda karantın rejimin elemeı, birneshe ret tártip buzǵandar bar. Mysaly, Esil aýdany Turan dańǵyly №2 mekenja­ıynda ornalasqan jazǵy kafesi bar. «Auraclub Alanya» túngi klýby shekteý jáne karantın sharalaryn buzǵany úshin 8 ret ákimshilik jaýapkershilikke tartyldy. Atap aıtqanda, belgilengen jumys ýaqytyn, maska taǵý tártibin, áleýmettik qashyqtyq saqtamaǵany úshin jáne túngi klýb pen karaoke bólmelerine tyıym salynǵanyna qaramastan jumysyn júrgizgeni úshin eskertý aldy», deıdi J.Pirálıeva.

Mamandar epıdemııalyq ahýal jazdaǵymen salystyrǵanda turaqtal­ǵanymen, vırýs qaýpi áli joǵary ekenin, eger turǵyndar sanıtarlyq erejelerine nemquraıly qaraı berse, jaǵdaı ýshyǵýy múmkin ekenin alǵa tart­ty. Búginde Nur-Sultan qalasyn­da kún saıyn úshten jıyrmaǵa deıin KVI aýrýyn juqtyrý faktisi tirkelip jatyr.

«Álemdegi epıdemııalyq ahýaldyń qalaı bolyp jatqanyn, birneshe memlekette indet qaıtadan kúsh alǵanyn qaperde ustaǵan jón. Biz qala turǵyndaryn maska kııýge, áleýmettik qashyqty saqtaýǵa jáne adamdar kóp jınalýy yqtımal oryndarǵa barý­dy shekteýge baılanys­ty qara­paıym talaptardy oryndaýǵa únemi shaqy­ramyz, biraq bul talaptar kóp jaǵ­daıda elene bermeıdi. Eger elor­da­lyqtar belgilengen talaptar men usy­nystarǵa ústirt qaraýdy jal­ǵas­tyra beretin bolsa, sondaı-aq naý­qas adammen jaqyn baılanys­ta bolǵany týraly aqparatty jasyr­sa, bul halyq arasynda aýrý juqtyrýdyń qaıta órshýine ákelip soǵýy múmkin. Ondaıda biz belgili bir qyzmet túrlerin toqtata otyryp, qatań karantındik sharalardy qaıta engizýge májbúr bolamyz. Sonymen qatar aldaǵy epıdemııalyq maýsymda tumaýǵa qarsy ekpe jasaý, ımmýnıtetti nyǵaıtý, jyly kıiný, syrqattanǵan jaǵdaıda óz betinshe emdelmeı, dereý dárigerdiń kómegine júginý kerek», dedi elordanyń bas memlekettik sanıtarlyq dárigeri.

Búginge deıin elordada tirkel­gen bar­lyq KVI juqtyrǵandar­dyń 4,2%-y, ıaǵnı 594-i – 14 jasqa deıingi balalar. Sondaı-aq 15-ten 17 jasqa deıingi 75 jas­óspirim indet juqtyrdy.