Qasıetińnen aınalaıyn, týǵan jer ár perzentiniń kókiregin qolamtanyń shoǵyndaı qyzdyryp, saǵynyshymen áldılep júrse deısiń, shirkin! At jalyn tartyp mingen ár azamat týǵan jerine tıtimdeı bolsa da sharapatyn tıgizse, ótpeli kezeńniń ókpek jelinen tońazyńqyraǵan shalǵaıdaǵy shaǵyn aýyldardyń shyraıy kirip qalar edi.
El ishinde jaqsy jańalyq, ádemi joralǵy az emes. О́tken jyly ǵana «Týǵan jer» baǵdarlamasy aıasynda jalpy quny 5,5 mlrd teńge bolatyn 69 janashyrlyq joba júzege asyryldy. Bul áýel basta jobalaǵan jospardan alty ese asyp túsken kórsetkish. Taratyp aıtatyn bolsaq, 86 nysan jańadan salynǵan. Úsheýi balalar baqshasy, 25-i sport alańy, 8-i turǵyn úı, 7-eýi balalar alańy, 11-i mádenıet nysany, 3-eýi medısına mekemesi. Mine, osylaısha qaltaly azamattardyń izgi nıetiniń arqasynda el oljaly bolyp otyr. Joǵaryda aıtylǵan sharýaǵa qosa oblysta 68 nysanǵa jóndeý jumystary júrgizilgenin aýyz toltyryp aıta ketýge bolar. Izgi nıettiń izetin kórgen, ilkimdi istiń sharapaty sharpyǵan nysandardyń 32-si mektep, 2-eýi balalar baqshasy, qalǵandary mádenıet, sport mekemeleri.
Oblys ortalyǵyndaǵy sportsúıer qaýymnyń nazaryn aýdarǵan jarqyn jobanyń biri – «Iveko» JShS-niń 200 mln teńge qarajatyna salynǵan sport zaly. Qazir ıgiligin el kórip otyr. Buryn shyǵys jekpe-jegimen aınalysatyn sportshylar jattyǵatyn jer taba almaı, jertólelerdi jalǵa alyp, tar qapasta tunshyǵyp júrse, endi mine, keń de jaryq sport zalǵa ıe bolyp otyr.
– Bul jeke sportshylarǵa ǵana emes, tutas elge jasalǵan janashyrlyq dep uǵýymyz kerek, – deıdi Qazaqstan Respýblıkasynyń sport sheberi, qara belbeýli karateshi Álimjan Moldaǵalıev, – elimizdiń ár azamaty, baldyrǵan balasy, jasóspirim jetkinshegi myqty bolýy kerek. Jumysqa da, el qorǵaýǵa da jaramdy. Seriktestiktiń óz qarjysyn aıamaı, qalyń eldiń qajetine jaraıtyn sport zalyn salyp berýi asqaq adamgershiliktiń ádemi úlgisi dep esepteımin.
Shynynda da qazir atalǵan sport zaly jastardyń jıi shoǵyrlanatyn jeri. Jalǵyz shyǵys jekpe-jegimen aınalysatyndar ǵana emes, oblys ortalyǵyndaǵy fýtbolqumarlar da osynda. Jaman tumaý jaılamaı turǵan ýaqytta kún qurǵatpaı jarys ótkiziletin. Eldi dýmandy dodanyń qyzyǵymen eliktiretin orynǵa aınalǵan.
Stepnogor qalasynda «BBNURA» seriktestigi jalpy quny 75 mln teńge turatyn dıalız ambýlatorııa ortalyǵyna jóndeý jumystaryn júrgizdi, jańa zamanǵy medısınalyq qural-jabdyqtarmen qamtamasyz etti. Shalǵaıdaǵy shaǵyn qala seriktestiktiń shynaıy janashyrlyǵynyń nátıjesinde sapaly medısınalyq qyzmetke qol jetkizip, bir toǵaıyp qaldy. Osyndaı jan jadyratar jaqsylyq Aqkól aýdanynda da oryn aldy. Munda «Hleborob» JShS Naýmov aýyldyq okrýginiń eldi mekenderin muntazdaı etip tazalap, abattandyrdy. Tozyǵy jetken aýyl ishindegi joldar tegistelip, jónge keltirildi. Okrýgtegi áleýmettik-turmystyq jaǵynan az qamtamasyz etilgen otbasylarǵa kómek kórsetildi. Osy qamqorlyqqa 20,4 mln teńge qarajat jumsady. Janashyr jandardyń kómegine el razylyǵyn aıtyp otyr. Arshaly aýdanynda jeke kásipker Olga Gýtıar balalar baqshasynyń jaýynmen birge jaýyp turǵan, ábden kónergen shatyryn jańartyp, bóbekter kıinip-sheshinetin jyly oryndy salyp berdi. Oǵan qosa hokkeı kortyn ornatty. Bir adamnyń qolymen osynshama qamqorlyq jasalyp jatqany kimdi bolsyn razy etedi emes pe? Eger eldiń bári Olga Vasılevna tárizdi ortaq iske bilek sybanyp kirisse, talaı eldi mekenniń óńi kirip, eńsesi kóterile túspes pe edi. Bulandy aýdanynda Vladımır Kýjlev Novobratskıı eldi mekenindegi orta mekteptiń tóbesin jańartyp berdi. Kásipker bul jumysqa 4 mln teńge qarajatyn jumsap otyr. Býrabaı aýdanyndaǵy Oqjetpes aýylynda jeke kásipkerler Z.Velıev pen J.Súleımenov ınternasıonalıst jaýyngerlerge jalpy quny 9,4 mln teńge bolatyn tamasha eskertkish ornatty. Jaýyngerlik boryshyn atqarý maqsatynda opat bolǵan azamattardyń arýaǵy razy. Sonadaıdan kóz tartatyn ajarly, aıbyndy eskertkish keıingi urpaqqa aldyńǵy tolqyn aǵalardyń erligi men órligin meńzep turǵandaı. Adam aıaǵy kóp júretin kýrortty aımaqtaǵy parasat tuǵyry kelimdi-ketimdi kisilerdiń de kózine jıi túsedi. Erlikpen qosa qutty eldiktiń belgisindeı bolyp tur.
Egindikól aýdanynda sportqumarlardy serpiltken ádemi jańalyq oryn aldy. «Sarymsaqty» JShS jalpy 17,1 mln teńge bolatyn angar tıptes at shaptyrym sport zalyn salyp berdi. Shaǵyn aýdannyń jastary úshin aq túıeniń qarny jarylǵan oqıǵa. Buryn bos ýaqytynda barar jer taba almaı júretin bozbalalar men boıjetkender endi ásirelep aıtqanda, sport zaldan shyqpaıdy dese bolǵandaı.
Imandylyq uıasy, Allanyń jerdegi úıi – meshitti salyp berip, jamaǵatty jaqsy iske bastap, uıytqy bolamyz deıtinder de az emes. Máselen, Ereımentaý aýdanynda H.Iаpas, B.Ahmetýlın, K.Mýkabak, K.Kapas tárizdi azamattar jalpy quny 21 mln teńge bolatyn jańa meshit salyp berdi.
El tarıhynda eleýli oqıǵa bolyp sanalatyn tyń ıgerý dáýiri de umyt qalmaǵan. Máselen, Jaqsy aýdanyndaǵy «Trýd» JShS alǵashqy tyń ıgerýshi Vasılıı Ragýzovtyń ónegeli ómiri men tyń dalanyń tósindegi tyndyrymdy eńbegin baıandaıtyn mýzeıdi jańǵyrtty. Bir jaqsysy keıingi jasty eńbekke tárbıeleýde yqpaly mol.
Jarqaıyń aýdanynda «Jarqaıyń» JShS Kostychevo aýylyndaǵy sport zalyna 35 mln teńgege kúrdeli jóndeý jumystaryn júrgizdi. Qazir sport zaldyń ishi qurylysshynyń qalaǵynan jańa shyqqandaı syńǵyrlap tur. Aýyl jastary bos ýaqyttaryn osynda ótkizedi. Aralarynda aýdandyq, oblystyq sport saıystarynda júlde alyp júrgenderi az emes. Aýyl sportynyń órkendeýine atsalysqan seriktestik basshylaryna turǵyndar da dán razy. Dál osyndaı janashyrlyq izgi qadam Qorǵaljyn aýdanynda da kórinis berdi. Kásipker A.Baltabekov aýdandaǵy ortalyq stadıondy 20 mln teńgege jóndep berip, el alǵysyna ıe bolyp otyr.
О́ńirdegi ónegeli is Sandyqtaý aýdanynda qanat jaıǵan. Osyndaǵy aǵaıyndy Orazalınder jetekshilik etetin «Baıdaly» JShS kóppáterli úıge kúrdeli jóndeý jasap, alty jas mamanǵa páter berip otyr. Oǵan qosa Veseloe orta mektebiniń kúrdeli jóndeý jumysyna 30 mln teńge qarajat bólgen.
Osy taqyrypty qaýzaǵanda qyz-kelinshekterdiń de erdiń eriniń ǵana qolynan keletin ónegeli is atqaryp júrgendigin ekpin túsirip aıtpaı tura almas edińiz. Selınograd aýdanyndaǵy Qosshy aýylynda «Qazyna SR» kompanııasynyń bas dırektory Saıra Mataıbaeva quny 350 mln teńge bolatyn 200 oryndyq syńǵyrlaǵan sý jańa mektep salyp bergendigin aıtsańyz, janashyr istiń joralǵysyna kóńilińiz gúldeıdi.
Aýdandaǵy Mánshúk aýylynda belgili mesenat Tımýr Pishenovtiń salyp bergen jańa balalar baqshasy sábılerdiń shat kúlkisine tolǵan. Kásipker bul nysandy memleketke tegin berip otyr. Janashyr jannyń jaqsy isi jalǵyz bul ǵana emes, kishkentaı ǵana eldi mekenge elıtalyq dúken saldy, aýyldyq klýbty kúrdeli jóndeýden ótkizdi.
Kókshetaý men Qaraótkeldiń boıyn jaılaǵan jalpaq jurttyń ishinde kisiligimen tanylǵan atymtaı jomarttar az emes. Sonyń ishinde eki mesenat respýblıkalyq «Jomart júrek» syılyǵyna ıe boldy. Olar – Jarqaıyń aýdanyndaǵy «Jarqaıyń» seriktestiginiń basshysy Vıtalıı Kamyshanskıı men «Shýıskoe 21» seriktestiginiń dırektory Altynbek Qurmanqulov.
Týǵan jerdiń tósin túletken, aýyldardyń ajaryn kirgizgen azamattarǵa myń alǵys! Eldiń eldigin kórsetetin, birligin baıqatatyn berekeli is bıyl da jalǵasýda.
Aqmola oblysy