Búgin oblys ákimi Gúlshara Ábdiqalyqova ustazdar kúni merekesine arnalǵan "Ustazym - ulaǵatty ónegem" atty arnaıy jıynǵa qatysyp, úzdik ustazdardy marapattady, dep habarlaıdy Egemen.kz oblys ákiminiń baspasóz qyzmetine silteme jasap.
Saltanatty sharada aımaq basshysy pedagogtarǵa memlekettik qoldaý sharalarynyń qarqyndy júrgizilip jatqanyn, ustazdardyń bilim berý salasynda tabysty jetistikterin atap ótip, kásibı merekemen quttyqtaıdy.
"Bul mereke shyn máninde barsha halyqqa ortaq. О́ıtkeni, kez kelgen mamandyq, kez kelgen laýazym ıesi ustazdan bilim, tárbıe alady. Jańa dáýir talabyna saı ozyq turǵan muǵalim ǵana shákirt aldynda bedeli bıik bolary sózsiz. Elimizde "Pedagog mártebesi týraly" Zań qabyldandy, bilim men ǵylymdy damytýdyń 2020-2025 jyldarǵa arnalǵan baǵdarlamasy bekitildi. Nátıjesinde, bıyldan bastap pedagog jáne olarǵa teńestirilgen qyzmetkerlerdiń eńbekaqysy ósýde. Bul – aımaq pedagogtaryna memleket tarapynan kórsetilgen úlken qoldaý", - dedi oblys ákimi.
2021 jyldyń qańtarynan muǵalimderdiń eńbekaqysyn 25 paıyzǵa kóbeıtiledi. Osy baǵytta aldaǵy úsh jylda 1,2 trıllıon teńge bólinetin bolady. Bıylǵy jyldyń ózinde bul maqsatta repýblıkalyq bıýdjetten oblysqa 27,4 mlrd teńge qarjy bólindi.
Oblys ákimi saltanatty jıynda eńbegimen tanylyp, qurmetke bólengen birqatar ustazdardy eń joǵary marapat – Y.Altynsarın atyndaǵy tósbelgi men "Bilim berý isiniń qurmetti qyzmetkeri" tósbelgisin tabystady. Qurmetke ıe bolǵandar qatarynda Q.Muhamedjanov atyndaǵy №1 mektep-gımnazııa muǵalimi Klara Esmaǵanbetova, Qazanǵap atyndaǵy Qyzylorda mýzykalyq joǵary kolledjiniń oqytýshysy Ásııa Boraqulova men Qazaly aýdany, №225 orta mektebiniń muǵalimi Roza Seksenbaeva bar.
Sondaı-aq úlgili ustazdardy Qurmet gramotasymen marapattady. Al, bilim berý salasyna úles qosqan 30 ustazǵa noýtbýk tabys etti.
Sharada onlaın rejıminde beıne konferens baılanys arqyly aýdandardan úzdik pedagogtar qatysyp, merekelik lebizderin bildirdi.
Aıta keteıik, bıyl alǵash ret Syr elinde táýelsizdik kúni qarsańynda bilim salasyna úles qosqan pedagogtarǵa erekshe tósbelgi tabystalady. Sonymen birge 10 ustazǵa 300 aılyq eseptik kórsetkish mólsherinde, ıaǵnı ár ustazǵa 833 myń teńge qarjylaı syıaqy beriledi. Ustazdardy qoldaý sharalary qarqyndy júrgiziledi.