О́tken aptada oblys ákimdiginde aımaqtyń qys maýsymyna daıyndyǵy pysyqtalyp, óńir basshysy Arhımed Muhambetov oblystyń jylý maýsymyna daıyn ekenin málimdedi. Al Qostanaı jylý-energııa kompanııasy (QJEK) 28 qyrkúıekten bastap barlyq jylý kózin iske qosty. Endi páter ıeleriniń tutynýshylar kooperatıvi birtindep turǵyn úılerge jylý jibere bastaıdy.
Qazirdiń ózinde ótinim bergen 48 áleýmettik nysan ortalyq jylý júıesine qosyldy. Oblys ortalyǵyndaǵy turǵyn úılerdiń birazy áli kúnge deıin tehnıkalyq daıyndyq aktilerin almaǵan. Sondyqtan olar jylý júıesine eń sońǵy kezekte qosylady. «QJEK» ókilderi tehnıkalyq aktisi joq úı turǵyndaryna ár páterge kirip turǵan ystyq sý qubyryn keshiktirmeı ashyp, jelige jınalyp qalǵan aýany syrtqa shyǵarý týraly keńes berdi. Olaı bolmaǵan jaǵdaıda qubyrdaǵy sý lastanyp, ystyq sýdyń sapasy kúrt nasharlaýy múmkin.
Jergilikti kompanııa jylý berýdiń sapasyn jaqsartý maqsatynda 30 jyl boıy qoldanylyp kelgen ortalyqtandyrylǵan jylýmen qamtý júıesindegi jelilik sýdyń temperatýralyq kestesin qaıta qarap, 31 tamyzda jańa keste bekitti. Buǵan deıin qubyrǵa jiberiletin ystyq sýdyń temperatýrasy 55 gradýsqa deıin bolyp kelse, endi jańa keste boıynsha jylý júıesiniń temperatýrasy 60 gradýstan kem bolmaıdy.
– Jylý taratýshy qubyrdaǵy temperatýranyń artýy bizdiń tutynýshylarymyz úshin qolaıly jaǵdaı týǵyzady. Osyǵan baılanysty kúz, kóktem aılarynda qala turǵyndarynan kelip túsetin aryz-shaǵymdar azaıady dep úmittenemiz, – dedi «QJEK» MKK baspasóz qyzmeti.
Energetıka jáne turǵyn úı-kommýnaldyq sharýashylyq basqarmasynyń basshysy Dáýren Asqarovtyń aıtýynsha, bıyl oblystaǵy 27 jobany júzege asyrýǵa 13 mlrd teńge bólingen. Bul jobalardyń ishindegi eń irisi de, eń mańyzdysy da – Arqalyq jylý energııasy ortalyǵyn rekonstrýksııalaý.
Arqalyq qalasyn ár jylý maýsymynan alyp shyǵý úshin jyl saıyn respýblıka bıýdjetinen 2 mlrd teńgeniń ústinde transfert bólinedi. Buǵan deıin qystan mazýtpen shyǵyp kelgen Arqalyqtyń jylý júıesin birtindep kómirge kóshirý maqsatynda bıýdjetten 7,4 mln teńge bólinip, «Arqalyq qalasynyń jylýmen jabdyqtaý júıesin 2030 jylǵa deıin qaıta jańartý» jobasy qolǵa alynǵan. Búginde jańa jylý kóziniń qurylysy qarqyndy. Bas ǵımarattyń astyńǵy qabaty tóselip, tabanyna betondy-eritindi torap salyndy. 3 bý qazandyǵy jáne sýmen jylytatyn 2 qazandyq ornatyldy.
– Jyl basynda josparlanǵan jumystyń 43%-y eńserilip, 3 mlrd 200 mln teńge ıgerildi. Qalanyń jańa jylý ortalyǵy 2021 jyldyń qyrkúıek aıynda paıdalanýǵa beriledi. Bıyl Arqalyq jylýmen jáne elektr qýatymen qamtamasyz etetin ortalyq mazýt otynyn paıdalanady. Qaladaǵy keıbir nysandar kómirmen jylytylady. Jylý maýsymyna jetetin mazýt jetkizip alý jaǵyn rettep aldyq. Bıyl bıýdjetten bólingen 1,39 mlrd teńgege 18,4 myń tonna mazýt satyp aldyq, – dedi Arqalyq qalasynyń ákimi Qaırat Ábishev.
Búginde oblys aýmaǵynda bas-aıaǵy 529 eldi meken bolsa, sonyń 70-ine tabıǵı gaz kelip tur. Turǵyn úı kommýnaldyq sharýashylyq basqarmasynyń málimetinshe, kóptegen aýdanda turǵyndar úıge gaz qubyryn tartqyzýǵa yqylassyz. Aýyldyq eldi mekenderde jylyna turǵyndardyń 10-15%-y ǵana kógildir otyn tartqyzady eken. О́ıtkeni gaz qubyryn ótkizýmen aınalysatyn mekemelerdiń qyzmeti asa qymbat bolǵandyqtan, ony ekiniń biriniń qaltasy kótere bermeıdi. Alaıda kógildir otynnyń qyzyǵyn kórip otyrǵan aýdandar da joq emes. Máselen, bıyl Fedorov aýdanynyń ortalyǵyndaǵy turǵyn úılerdiń teń jartysynan astamy gazben jumys isteıtin ortalyqtandyrylǵan jańa qazandyqtar arqyly jylytylady.
Qostanaı oblysy