Qostanaı oblysynda jyl basynan beri qos azamattyǵy bar 300-den astam azamat anyqtalǵan. «Eki jep bıge shyqqan» eptilerdiń birazy ondaǵan jyldar boıy eki memleketten zeınetaqy alyp kelgen. Kóshi-qon departamentiniń bastyǵy Qaırat Dútpaevtyń aıtýynsha, taıaýda taǵy 27 turǵynnyń qos pasportpen júrgeni áshkerelenip otyr.
Elimizdiń bas zańyndaǵy 10-baptyń 3-tarmaǵynda Qazaqstan azamatynyń basqa eldiń azamattyǵyn alýyna tyıym salynatyny aqqa qara jaqqandaı ap-anyq jazylǵan. Bul kisilerdiń aty-jónderin atamaı-aq qoıaıyn, kóbi egde tartqan kisiler. Olar zańdy belden basyp, jazaly bolǵandarymen qoımaı, Elbasy men Prezıdenttiń atyna hat joldap, shaǵym aıtýda. Mazmuny «Men tyń ıgerý bastalǵaly Qazaqstanda eńbek etip kelemin. Ata-babam da osy jerde ómir súrgen. Munda páterim, kóligim bar. Al kóshi-qon qyzmeti meni azamattyǵymnan aıyryp, elden qýyp jibermek. Ádildik qaıda? Men Qazaqstannyń azamatymyn. Eshbir kinám joq, sýdan aq, sútten tazamyn. Iá, toqsanynshy jyldardyń basynda kerek bolyp qalar dep ózime Reseıdiń pasportyn resimdep alǵanmyn. Ol kezde aýmaly-tókpeli zaman edi, jaǵdaı túsiniksiz boldy. Jaman aıtpaı jaqsy joq, zaman olaı-bulaı bolyp kete me dep osyndaı saqtyq jasaǵanym ras. Qazir kóshi-qon qyzmeti meni Qazaqstan azamattyǵynan aıyryp otyr. Zańdy mártebemdi qaıtaryp berýińizdi ótinemin. Al Reseı pasportyn qazir-aq laqtyryp jiberýge daıynmyn» degenge saıady, – dedi Qaırat Dútpaev.
Áıteýir baıbalam salýǵa sheber qos azamattyǵy barlarǵa kóshi-qon qyzmeti «azamattyǵynan eshkim de aıyrylmaıtynyn, bul tek erekshe jaǵdaılarda ǵana sot arqyly qabyldanatyn shara ekenin» túsindirip álek. Toqsanynshy jyldardyń basyndaǵy aýmaly-tókpeli zamannyń ótkenine 30 jyl boldy. Osy ýaqytqa deıin eki eldiń azamattyǵyn astyrtyn enshilep, aıyna Qazaqstannan bir, Reseıden eki zeınetaqy alyp kelgen azamattardyń zańǵa qaıshy áreketin qalaı baǵalaýǵa bolady? Osy topyraqta ósip-ónip, eńbek etip, osy eldiń ıgiligin kórip otyrǵan mundaı azamattardy qara basynyń qamy úshin óz otanyn aldaǵan ákki alaıaqtardyń qataryna qosýdan basqa shara joq.
Kóshi-qon qyzmeti basshysynyń sózinshe, qosmekendiler shekaradan ári-beri ótemin dep júrip áshkerelenedi eken. Mundaı azamattar týraly aqparattar bizge kóbine shekarashylardan kelip túsedi. Máselen, azamat byltyr shekaranyń arǵy betine qazaqstandyq tólqujatpen ótse, bıyl reseılik pasportpen ótedi. Qos azamattyq faktilerin anyqtaýǵa notarıýstar da kóp kómektesedi. Olar qandaı da bir kelisimsharttardy resimdeýge kelgen azamattardyń qos qujaty bar ekenin elektrondy baza arqyly anyqtaıdy. Keıde reseılik áriptesterimen qujat salystyrǵan zeınetaqy qorynyń qyzmetkerleri de qos azamattyqta júrgen adamdardy anyqtap jatady. Qazirgi sıfrly álemde bir nárseni jasyrýdyń máni joq. Kez kelgen qupııanyń áıteýir bir ashylatyn kezi bolady. Mundaı paıdakúnemder eki jep utamyn dep júrip, óz azamattyǵynan aıyrylyp qalýy múmkin. Al bizdiń mindetimiz – azamattyǵynan aıyrylǵandardy tirkep otyrý ǵana. Aıtpaqshy, Qazaqstanda qos azamattyǵy áshkerelengender ákimshilik jaýapkershilikke tartylýy múmkin, al Reseıde mundaı azamattar qylmystyq jaýapkershilikke tartylady, – dedi Q.Dútpaev.
Qostanaı oblysy