Qaıyrymdylyq jasaý úshin qaltaly bolý mindet emes eken. Eń bastysy, kókiregińde izgiliktiń izetti názik sezimderi burqyrap tursa bolǵany. Osyndaı jan jadyratar jaqsy qasıettiń jastardyń boıynda mol ekenin kórgende, bolashaqqa degen senim nyǵaıa túsedi.
Sońǵy jyldary adamdardyń bir-birine degen qamqorlyǵy kóbeıip keledi. Qysyltaıań kún týǵanda qol- ushyn sozý, janyndaǵy adamdarǵa shyn yqylasymen janashyrlyq jasaý kóbeıdi. Osynyń ózi-aq qoǵamdy izgilendirip, jas tolqyndy bir-birine barynsha baýyrmal bolýǵa tárbıeleıdi. Oblys ortalyǵyndaǵy Janaıdar Mýsın atyndaǵy joǵary qazaq kolledjiniń bilim alýshylary ózderiniń boıyndaǵy tamasha tálimimen tánti etýde.
«Rahat» volonterler klýbynyń bar múshesi osy kolledjdiń bilim alýshylary. Atalǵan klýbqa 15-ke jýyq eriktiler tirkelgen eken. Olar jaman tumaý jan alqymnan alyp, indet údep turǵan kezde ártúrli aýksıondar uıymdastyryp, azyn-aýlaq qarajat jınap, áleýmettik jaǵynan az qamtylǵan adamdarǵa kómek qolyn sozypty. Kolledj bilim alýshylarynyń qarjysy qanshalyqty kóp deısiz. Biraq, eń bastysy olar rýhanı jaǵynan baı. Eń bastysy da sol emes pe?
– Halqymyzdyń boıynda osyndaı qasıettiń moldyǵy jan saraıyńdy nurlandyra túsedi, – deıdi kolledj dırektory Nurtas Ahat, – bul eń aldymen jaratylystyń, sodan soń otbasyndaǵy tálimdi, adamgershilikke negizdelgen tárbıeniń jemisi. Biz sol bar dúnıeni jetildirip, kemeldendire túsýdemiz. Kolledjde arly adamgershilikke, bıik parasatqa tárbıeleıtin áldeneshe úıirmeler jumys isteıdi. Bolashaq muǵalimderdiń boıynda bilimmen birge kisiliktiń, kishiliktiń dáni búr jarǵany qandaı jaqsy!
Volonter jastar qarǵa adym jer muń bolǵan qarııalardyń baspanalaryn jýyp-tazalap, syrlap-sylap beripti. Qoldarynan kelgenderi osy. Janashyr jastardyń biri – on segizdegi Aıza Myńjasarova. Ol taıaýda «Jylý syılaımyz» atty aksııaǵa qatysyp, qaıtarymsyz grant utyp alǵan. Sol aqshaǵa jalǵyzbasty qarııanyń úıin jóndeýde.
– Aldymen semınarǵa qatystyq. 68 grant usynyldy. Men oılanyp-tolǵana kele, «Jylý syılaımyz» jobasyn daıyndap, baıqaýǵa qatystym. Oblystyq jastar resýrstyq ortalyǵyna habarlasyp, jalǵyzbasty qarııany taýyp alyp, jaǵdaıyn muqııat zerdeledik. Baspanasy da qarııanyń ózi tárizdi qaýsap tur eken. Aıap kettik. Tipti, úıinde tereze de joq, – deıdi Aıza.
Grant qarjysy eki transhpen bólingen. Alǵashqy 150 myń teńgesine qurbysymen birge jalǵyzbasty qarııanyń úıin jóndeýge qolǵabysyn tıgizgen. Sý jylytqysh ornatyp beripti. Ekinshi transh boıynsha túsken aqshaǵa tereze saldyryp beremiz dep qulshynyp otyr.
Qaptaǵan qara órtke qanatymen sý sepken qarlyǵashtaı el ishindegi qamqorlyqqa zárý qarııalarǵa qol- ushyn berip, qoltyǵynan demegen qaıyrymdy jastardyń qareketin kórgende el irgesiniń bekı túsetindigine degen senim nyǵaıa beredi eken.
KО́KShETAÝ