Dúnıejúzilik bank jyl saıynǵy Memlekettik basqarý ındıkatorlary (Worldwide Government Indicators WGI) esebiniń jańartylǵan nusqasyn jarııalady. Bul – Dúnıejúzilik bank tobynyń memlekettik basqarýdyń sapasy men tıimdiligi salasyndaǵy álem elderiniń jetistikterin baǵalaıtyn keshendi zertteý.
Zertteý ádistemesinde memlekettik basqarý sapasynyń negizgi kórsetkishterin keshendi túrde aıqyndaıtyn 6 negizgi ındıkator qoldanylady. Jańartylǵan esepte Qazaqstan 5 kórsetkish boıynsha oń nátıje baıqatqan. Atap aıtqanda, úkimet jumysynyń tıimdiligi, retteýshilik klımat sapasy, saıası turaqtylyq, zańnyń ústemdigi, sondaı-aq jemqorlyqpen kúreste jaqsy kórsetkish tirkelgen. Dúnıejúzilik bank úkimettiń bılik ınstıtýttaryn kúsheıtý, olardyń tıimdiligin, ashyqtyǵyn jáne boljamdylyǵyn arttyrý baǵytyndaǵy júıeli jumysyn joǵary baǵalady.
Zertteýge sáıkes, Úkimet jumysynyń tıimdiligi memlekettik apparat jumysynyń sapasy men saıası-ekonomıkalyq baǵyttaǵy turaqtylyq, sondaı-aq halyqtyń negizgi memlekettik qyzmetterdi (kólik, ınfraqurylym) tutyný deńgeıin arttyrý esebinen jaqsarsa kerek.
Retteýshilik klımatqa toqtalsaq, elimiz birneshe jyldan beri qalǵan ólshemdermen salystyrǵanda, eń úzdik nátıjeni kórsetip keledi. Byltyr Qazaqstan sheteldik ınvestorlar úshin bıznes júrgizýdegi táýekelderdi tómendetý baǵytynda tıimdi jumys júrgizý arqyly óz ornyn kóterdi.
Dúnıejúzilik bank esebinde bıliktiń sabaqtastyqty qamtamasyz etýde, sondaı-aq ishki jáne syrtqy janjaldardy boldyrmaý esebinen elimizdegi saıası turaqtylyq kórsetkishteriniń jaqsarǵany týraly aıtylǵan.
Zań ústemdigine kelsek, daýlardy balamaly retteý júıesin damytý, quqyqtyq tártipti qamtamasyz etý, sol sekildi azamattyq jáne qylmystyq zańnamalardy jaqsartý esebinen ilgerileý baıqaldy.
Sybaılas jemqorlyqqa qarsy kúres boıynsha halyqtyń paraqorlyqty qabyldaý sýbındıkatorlarynyń jaqsarýy negizinde jáne bıznes júrgizýde jemqorlyq táýekelderiniń tómendeýi esebinen artty.
WGI esebin ozyq halyqaralyq qarjy uıymdary, damý ınstıtýttary jáne reıtıng agenttikteri ulttyq ekonomıkalardyń boljamdary men nesıelik baǵalaýlaryn qalyptastyrý úshin keńinen qoldanady.
Zertteý nátıjeleri boıynsha Fitch reıtıng agenttigi de ulttyq ekonomıkanyń kredıttik baǵasyn «BBB» deńgeıinde nyǵaıta otyryp, Úkimet jumysynyń oń dınamıkasyn atap ótti. Bıyl tamyzda pandemııadan týyndaǵan álemdik ekonomıkalardyń kredıttik baǵalaýlaryn qaıta qarastyrý arqyly Fitch Qazaqstan ekonomıkasynyń «BBB» deńgeıindegi pandemııaǵa deıingi baǵalaýyn rastady. Demek boljam turaqtylyqty kórsetken.