Poshta – memlekettik baılanys júıesiniń mańyzdy mekemesi ekeni daýsyz. Qyzmeti san salaly bolǵandyqtan da, oblys ortalyǵyndaǵy poshta bólimshesi adam aıaǵy úzilmeıtin oryn.
«Kazposhta» aksıonerlik qoǵamy Astana fılıalynyń Kókshetaý qalalyq bólimshesi qala turǵyndaryna qaltqysyz qyzmet etýde. Oblys ortalyǵyndaǵy 15 bólimshe óz qyzmetterin tıimdi uıymdastyrýdyń arqasynda barlyq jumysty sátti júrgizip keledi. Qala turǵyndary ózderiniń qajetine oraı zattaryn jetkizý, aqparat almasý qyzmetterin paıdalanady. Mekeme basshylarynyń aıtýyna qaraǵanda, qazirgi kúni banderol, úlken ólshemdi aýyr júkterdi jiberý jáne jetkizý, merzimdik basylymdarǵa jazylý, olardy satý, arnaıy baılanys qyzmetin paıdalaný suranysqa ıe. Poshta jelisi – bıznes jáne halyq úshin elektrondy saýdany, kólik-logıstıkalyq servısti, qarjylyq qyzmetterdi alǵa jyljytý úshin tıimdi qural.
Negizinen qala turǵyndaryna kórsetiletin qyzmet túrleriniń biri – zeınetaqy men járdemaqy taratý. Bul oraıda, irkilis joq. Jaman tumaý jan alqymnan alǵan kezde de poshta qyzmetkerleri kópshiliktiń kóńilinen shyǵatyndaı qyzmet istedi. Sondaı-aq ártúrli hat-habarlardy ýaqtyly jetkizip berý. Bul arada aragidik aryz-shaǵym da aıtylyp qalatyn tustary bolady eken. Onyń ózindik sebebi bar. Máselen, kópqabatty úılerindegi poshta jáshikteriniń kópshiligi kiltke jabylmaıdy. Túsip qalýy da, oıyn balalarynyń alyp ketýi de ǵajap emes. Degenmen poshta qyzmetkerleri jaýapkershilik júgin jete túsinedi. Sondyqtan da ujymdaǵy 120-ǵa jýyq adam osy maqsatta óz mindetterine muqııat qarap, halyq talabyna saı jumys isteýde. Ortasha jalaqy 80 myń teńge tóńireginde.
– Poshta qyzmetin paıdalaný jyl ótken saıyn azaıyp keledi. Ol zańdy da. Qazirgi kúni elektrondy habar taratý ábden jetildirildi. Sondaı-aq onlaın baılanys ta bar. Qyzmet aýqymyn keńeıtý úshin jańalyq bolyp esepteletin tyń dúnıelerdi oılastyrýdamyz. Máselen, ekinshi dárejeli banktermen kelisimshart jasasyp, nesıe berýdi uıymdastyrýdamyz. Júzden astam adam nesıe alyp úlgerdi. Sondaı-aq sálemdemeler joldanǵan mekenjaıǵa deıin jetkiziledi. Osy oraıda, iri kólemdi zattardy qabyldap, elimiz boıynsha jóneltý qolǵa alynǵan. Munyń barlyǵy sońǵy ýaqytta zaman talabyna saı uıymdastyrylyp, tyńǵa túren salyp otyrǵan dúnıeler, – deıdi bólimsheniń bas mamany Baýyrjan Júsipov.
Mekeme basshylarynyń aıtýyna qaraǵanda, qolbaılaý bolyp otyrǵan jaılar da az emes kórinedi. Máselen, poshta tasýshylardyń qyzmetinde júıkege júk túsiretin, kópten beri aıtyla-aıtyla ábden jaýyr bolǵan másele az emes. Aıtalyq kópqabatty úılerdiń syrtqy esigi kiltpen jabylady. Qaýipsizdik úshin ol da kerek shyǵar. Biraq sonyń ózi poshta salatyn jáshikter ishte bolǵandyqtan, kóp-kórim qıyndyq týdyrýda. Al qalanyń shetkeri ornalasqan aımaqtaryndaǵy jekemenshik úılerdiń joly syn kótermeıdi. Bos júrgen buralqy ıt kóp. Burnaǵy jyldary oqys oqıǵalar da oryn alǵan. Biraq sonyń bárine qaramaı, poshta tasymaldaýshylar óz jumystaryn minsiz atqarýǵa tyrysady.
– Endigi bir másele – baspasóz taratý jaıy. О́tken jylǵy jospar júz paıyz oryndalǵan. Bıyl indetke baılanysty jaǵdaıdyń kúrdeli bolatyn túri bar, – deıdi qalalyq bólimshe basshysynyń orynbasary Álıma Baltabaeva.
Qala turǵyndary tarapynan gazet-jýrnaldardyń satylýy týraly ótinishter jıi aıtylatyndyǵyn da aıta ketkenimiz oryndy bolar. Máselen, oblys ortalyǵyndaǵy buqaralyq aqparat quraldaryn satatyn dúńgirshekterde negizinen sheteldik basylymdar kóbirek satylady. Ásirese temir jol men avtobeket mańynda jergilikti ult tilindegi basylym izdegender kóp-aq.
Tutastaı alǵanda poshta qyzmetinde zaman talabyna saı jańalyq az emes. Sonyń barlyǵy baılanys júıesiniń mańyzyn arttyra túsýge baǵyttalǵan.
KО́KShETAÝ