Senattyń Áleýmettik-mádenı damý jáne ǵylym komıtetiniń depýtattary ataýly áleýmettik kómek kórsetý aıasynda az qamtylǵan otbasylardan shyqqan balalardy kepildendirilgen áleýmettik paketpen qamtamasyz etý máselelerin talqylady, dep habarlaıdy Egemen.kz Parlament Senatynyń baspasóz qyzmetine silteme jasap.
Komıtet tóraǵasy Murat Baqtııaruly áleýmettik kómek memlekettik áleýmettik saıasattyń bir bóligi retinde halyqtyń álsiz toptaryna qoldaý kórsetýge baǵyttalǵanyn atap ótti.
"Búginde kómek túrli sanattaǵy adamdarǵa kórsetiledi jáne 3,7 mıllıonǵa jýyq qazaqstandyqty, ıaǵnı elimizdiń árbir besinshi azamaty qamtylady. Qoǵamnyń áleýmettik mártebesi azamattardyń ál-aýqatyna baılanysty. Sondyqtan Memleket basshysy óz Joldaýynda áleýmettik qoldaý sapasyn arttyrý máselelerine erekshe nazar aýdaryp keledi", dedi Murat Baqtııaruly.
Senatordyń aıtýynsha, Úkimet keıingi jyly áleýmettik salany reformalaý jóninde Parlamentpen birlesip aýqymdy jumys júrgizdi. О́tken jyldyń sońynda birlesken jumystyń arqasynda az qamtylǵan azamattar men kóp balaly otbasylardy qoldaýǵa baǵyttalǵan ataýly áleýmettik kómek júıesin reformalaýdyń jańa tásilderi engizildi.
Eńbek jáne halyqty áleýmettik qorǵaý mınıstri Birjan Nurymbetovtiń aıtýynsha, Qazaqstanda 2020 jyly 6 jasqa deıingi balalarǵa arnalǵan azyq-túlik jáne turmystyq jıyntyqtar alǵash ret qarastyrylyp otyr. Kúdikshildik pen kómekti aqshalaı berý týraly usynystarǵa qaramastan azyq-túlik jáne turmystyq jıyntyqtar tótenshe jaǵdaı kezinde óziniń ýaqyt talabyna saı ári qajettiligi dáleldendi. Búginde mektepke deıingi jastaǵy 213 myń bala osyndaı jıyntyqtarmen qamtamasyz etildi.
"Azyq-túlik-turmystyq jıyntyqtardy jedel jáne úzdiksiz jetkizýdi qamtamasyz etýde 543 ónim jetkizýshiniń ataýy qamtylǵan tizbe bekitildi. Kepildendirilgen áleýmettik paket negizinen iri saýda jelileri arqyly beriledi. Taýar jıyntyqtaryn jetkizýdi aýyldyq jerlerde jergilikti ákimder júzege asyrady. Iri qalalarda kómek alýshylar saýda oryndarynan ózderi alyp ketedi", dedi Birjan Nurymbetov.
Mınıstr sondaı-aq pandemııanyń áserinen týyndaǵan jaǵdaıdy eskere kelip, osy jyldyń naýryz aıynan bastap jáne tótenshe jaǵdaı men shekteý sharalarynyń barlyq kezeńine halyqtyń áleýmettik álsiz sanattaryna, onyń ishinde AÁK alatyn mektep jasyndaǵy balalarǵa 2 AEK mólsherinde azyq-túlik jıyntyǵyn satyp alý úshin aı saıyn aqshalaı tólemder júzege asyrylǵanyn atap ótti.
Sonymen qatar, bilim jáne ǵylym mınıstriniń orynbasary Bıbigúl Asylova orta bilim berý mekemelerinde mektep jasyndaǵy balalarǵa kepildik berilgen áleýmettik paketti iske asyrý boıynsha qabyldanyp jatqan sharalar týraly aıtyp berdi. Onyń aıtýynsha, balalar oqıtyn jerinde ystyq tamaqpen, mektep oqýshysy úlgisindegi kıimmen jáne basqa da oqý quraldarymen qamtamasyz etiledi.
Otyrysqa qatysýshylar kezdesý barysynda senatorlardyń zań shyǵarý qyzmetinde paıdalanatyn usynystardy ortaǵa saldy.
Sharaǵa halyqty áleýmettik qorǵaý mınıstri Birjan Nurymbetov, bilim jáne ǵylym mınıstriniń orynbasary Bıbigúl Asylova qatysty.