Agroónerkásip keshenindegi saqtandyrý salasynyń operatory – Aýyl sharýashylyǵyn qarjylaı qoldaý qory iri qara maldy saqtandyrý ónimderin bekitti, dep habarlaıdy Egemen.kz "Aýyl sharýashylyǵyn qarjylaı qoldaý qory" AQ baspasóz qyzmetine silteme jasap.
Osy ýaqytqa deıin agroónerkásip kesheninde maldy maqsatty túrde saqtandyrý bolǵan joq. Iesi malyn tek múlik retinde saqtandyra alatyn. Eger, joǵalsa nemese kólik qaǵyp ketken jaǵdaıda ǵana saqtandyrý tólenetin. Endi aýrýdan jáne basqa da qaýip-qaterlderden saqtandyra alady.
Qazirgi epızootııalyq jaǵdaı eskerilip, sheteldik qaıta saqtandyrýshylarmen birge túrli táýekelderdi saqtandyrý ónimderi ázirlendi. Osy ónimder arqyly fermerler maldy óz sharýashylyǵynyń aýmaǵynda jáne 5 km radıýstaǵy kórshi sharýashylyqtardyń aýmaǵyndaǵy aýrýlar men basqa da táýekelderden saqtandyra alady. Táýekelder qatarynaınfeksııalyq jáne asa qaýipti aýrýlar, órt, úshinshi tulǵalardyń zııandy áreketteri, qaýipti tabıǵı qubylystar, sondaı-aq jazataıym oqıǵalar – jarylys, naızaǵaı túsý, tunshyǵyp ólý, jyrtqysh ańdardyń shabýyly, jylan nemese jándikterdiń shaǵýy, túrli sebeptermen jaraqattanýy jáne taǵy basqalar kiredi.
"Qazir elimizde etti jáne sútti baǵyttaǵy mal sharýashylyǵyn damytý baǵdarlamalary júzege asyrylyp keledi. Myńdaǵan sharýa qojalyqtary etti baǵyttaǵy asyl tuqymdy iri qara mal satyp alý úshin jeńildetilgen nesıemen qarjylandyrylýda. Mundaı jaǵdaıda nesıe berýshi uıymdardyń taban tireıtin qaýipsizdik tetigi bolýy mańyzdy. Biz jańa saqtandyrý ónimderin engizý fermerlerge táýekelderden qorǵanýǵa, jobalardy qarjylandyratyn kompanııalarǵa salǵan qarajattaryn qorǵaýǵa múmkindik beredi dep sanaımyz", deıdi "Aýyl sharýashylyǵyn qarjylaı qoldaý qory" AQ basqarma múshesi – basqarýshy dırektory Asqar Qalıev.
Iri qara malǵa qatysty táýekelder álemdik naryqtaǵy "A" reıtıngi bar Halyqaralyq qaıta saqtandyrý kompanııalarynda saqtandyrylady. Bul saqtandyrý jaǵdaıy týyndaǵan kezde fermerlerge kepildendirilgen tólemderdi qamtamasyz etýge múmkindik beredi.
Shart jasasý prosesi, odan ári fermer men saqtandyrý kompanııasynyń jáne operatordyń jumysy WWW.QOLDAU.KZ elektrondyq platformasynda júrgiziledi.
"Mal sharýashylyǵyndaǵy saqtandyrý syıaqylaryn memleket sýbsıdııalaıdy. Naqty aıtqanda, saqtandyrý shartyn jasasqan soń saqtandyrý syıaqy somasynyń 50 %-n fermer, 50 %-n memleket tóleıdi. Bul – malshylar úshin saqtandyrýdyń qoljetimdiligin arttyrýǵa jáne jalpy saqtandyrý salasyn yntalandyrýǵa baǵyttalǵan. Bul maqsatqa respýblıkalyq bıýdjetten 2,5 mlrd teńge qarjy bólindi", deıdi Asqar Qalıev.
Saqtandyrylatyn maldyń sanyna baılanysty saqtandyrý tarıfi 1,54 %-dan 4,62 %-ǵa deıingi aralyqty qamtıdy. Mysaly, fermer óz aýmaǵynda 30-dan 99 basqa deıin saqtandyrǵysy kelse, ol jalpy saqtandyrý somasynyń 2,31 %-n tóleıdi. Eger 100 bastan astam malyn saqtandyratyn bolsa, tarıf 1,54% bolady. Eger fermer malyn 5 km radıýstaǵy táýekelderden saqtandyratyn bolsa, onda 30-99 basqa deıingi tarıf 4,62 %. Júz jáne júzden astam basqa jalpy saqtandyrý somasynyń 3,08 %-yn tóleıdi.
Platformaǵa tirkelý arqyly fermer saqtandyrý kompanııasy men maldy tańdaıdy (júıe janýarlardy sáıkestendirý bazasymen biriktirilgen), saqtandyrý syıaqysynyń 50 %-n tóleıdi jáne elektrondy sıfrlyq qoltańbanyń kómegimen shartqa qol qoıady. Saqtandyrý kompanııasy shartqa qol qoıyp, operatorǵa sýbsıdııany tóleý jóninde ótinim jiberedi. Operator qalǵan 50 %-n tólegennen keıin saqtandyrý sharty kúshine enedi.
Saqtandyrý jaǵdaıy týyndaǵanda fermer saqtandyrý kompanııasyn jáne veterınarlyq, sondaı-aq basqa da osyǵan qatysy bar qyzmet ókilderin (polısııa, ákimdik jáne t.b.) habardar etýi tıis, olar faktini tirkep, tıisti qujat beredi.
Fermer rastaıtyn qajetti qujattar paketin jınap, olardy elektrondy platformaǵa júkteıdi jáne saqtandyrý tólemine ótinish beredi. Tekserilip, bári durys ekeni anyqtalǵan soń fermer saqtandyrý tólemin alady.
"QazAgro" Holdınginiń enshiles kompanııasy – Aýyl sharýashylyǵyn qarjylaı qoldaý qoryAgroónerkásip kesheniniń basym baǵyttaryn damytý jáne halyqty jumyspen qamtý deńgeıin arttyrý maqsatynda shaǵyn kásipkerlikti qarjylandyrady.