Qazaqstan ekonomıkasy jyl sońyna deıin 2,5%-ǵa qysqarady. Bul týraly Dúnıejúzilik banktiń Eýropa men Azııa boıynsha ekonomıkalyq sholýynda aıtyldy.
Halyqaralyq qarjy ınstıtýty maýsym aıynda Qazaqstannyń IJО́ bıyl 3%-ǵa qysqarady dep boljaǵany esimizde. Bul baılamdy qaıta qarastyrǵan uıym sarapshylary ony birshama jaqsartqany baıqalady. Bank ekonomısteriniń pikirine sensek, 2020 jyly aıtarlyqtaı salyqtyq jáne basqa da jeńildikterge qaramastan respýblıkada ekonomıkalyq belsendiliktiń kúrt tómendeýi jáne jumyssyzdyq pen kedeıliktiń ósýi oryn alýy múmkin.
2021 jyly IJО́ ósimi 2-3% shegindegi deńgeıge deıin qalpyna kelýi, sondaı-aq kedeıshilik deńgeıi birtindep tómendegen jaǵdaıda ǵana tek 2022 jylǵa qaraı pandemııaǵa deıingi ahýalǵa oralýy múmkin dep naqtylady uıym sarapshylary.
Inflıasııalyq qysym osy jyly saqtalyp, tek 2021 jyly birtindep tómendeıdi dep boljanýda jáne Ulttyq banktiń maqsatty dıapazonynan joǵary qala bermek.
Tólem balansynyń aǵymdaǵy shoty 2020 jyldaǵy defısıtpen para-par kelýi yqtımal. О́ıtkeni OPEK + kelisimi óz kúshin saqtap qalǵanyn eskersek, ımport qalpyna endi kele bastaıdy. Sonymen birge syrtqy tólem balansy qysymynyń azaıýy eksport pen munaı baǵasynyń birtindep jaqsarýy men fıskaldy yntalandyrýlardyń álsireýine táýeldi.
Dúnıejúzilik bank mamandary Qazaqstan Úkimeti 2021 jyly bıýdjet tapshylyǵyn qysqartýdy kózdep otyrǵanyn eske saldy. Qarjy uıymy kelesi jyly munaı tapshylyǵynan tys IJО́ kórsetkishi aǵymdaǵy 15%-dan shamamen 9%-ǵa deıin tómendeıdi dep baǵamdasa kerek. Biraq orta merzimdi maqsattaǵy 6%-dan joǵary bolady.
Bıyl memlekettik qaryz 2019 jyldaǵy 20%-dan shamamen 26,6%-ǵa deıin ulǵaıýy múmkin. 2021 jyly onyń mólsheri 30%-ǵa jetýi ǵajap emes. Esepte kórsetilgendeı, bul sandar qalypty jáne Úkimet qaryzdyń osyndaı kólemin óteýge qaýqarly.
Dúnıejúzilik banktiń boljamyna sáıkes, Ortalyq Azııa elderiniń ekonomıkasy osy jyly 1,7%-ǵa qysqarady. Bul byltyrǵy ósý qarqynymen salystyrǵanda óńir úshin qaýipti quldyraýmen teń.
Bıyl Qyrǵyzstanda ósý qarqyny 5,5%-ǵa tómendeýi múmkin. Tájikstan men О́zbekstan resessııadan qutyla alǵanymen olardyń IJО́-niń ósý boljamy kóńil kónshiterlikteı emes. Mysaly, Tájikstanda – 1,6%, О́zbekstanda – 0,6%. Sáıkesinshe, 2019 jyly onyń deńgeıi 7,5% jáne 5,6% mejesinde bolǵan-dy.
Ulttyq ekonomıka vıse-mınıstri Mádı Takıev 8 shildede Úkimet 2020 jyldy oń ekonomıkalyq ósimmen aıaqtaýǵa úmitti ekenin habarlaǵan edi. Alaıda álemdik qarjy ınstıtýttary bıylǵy toqsannyń qorytyndysy boıynsha Qazaqstan ekonomıkasyn quldyraý kútip tur dep esepteıdi.