Nur Otan partııasynyń Qostanaı oblystyq fılıalynyń tóraǵasy Arhımed Muhambetov partııaishilik irikteýge qatysýshylarmen kezdesip, praımerız qorytyndylary men úgit-nasıhat jumystary barysynda kóterilgen ózekti máseleler týrasynda sóz qozǵap, barlyq qatysýshylarǵa alǵys hat tabystady.
«Búgingi tańda adamdar qoǵam ómirine belsendi atsalysqysy keledi. О́zgeristerge, jańa tulǵalar men tyń ıdeıalarǵa degen suranys arta túsýde. Elimizdiń jetekshi saıası kúshi retinde Nur Otan partııasy el suranysyn der kezinde qanaǵattandyryp otyr. Jarııa túrdegi partııaishilik irikteý elimiz úshin sony saıası jańalyq retinde jurt qyzyǵýshylyǵyn týdyrǵany sózsiz. Oblysymyzdan praımerızge 800 adam qatysty. Aýqymdy úgit-nasıhat jumysy, júzdegen kezdesýler ótkizilip, 150-den astam jarııa pikirtalas uıymdastyryldy.
Praımerız aımaqtyń qoǵamdyq-saıası ómirine qajet partııa múshelerin tańdaýǵa kómektesti. Praımerızge qatysýshylardyń barlyǵy, reıtıngine qaramastan, partııanyń konsýltatıvtik keńes organdaryna engiziledi. Praımerızge belsendi qatysqan úmitkerlerge alǵys bildirgim keledi», dedi Arhımed Muhambetov.
Qatysýshylar tarapynan da jyly lebiz bildirýshiler tabylyp jatty.
«Men Nur Otan partııasyna osyndaı múmkindik bergeni úshin úlken alǵysymdy bildirgim keledi. Biz úshin bul zor tájirıbe boldy. О́tkizgen árbir kezdesýimiz ben kezdestirgen árbir adam bizdi jańa dúnıelerge úıretti. Praımerız bizge jańa dos, syrlas taýyp berdi. Barlyǵyńyzǵa alǵysym sheksiz», dedi Natalıa Lapshına.
Praımerız ótkizý jónindegi ortalyq uıymdastyrý komıtetiniń aqparatyna sáıkes, Qostanaı oblysy boıynsha tórt kúnge sozylǵan daýys berýge 38 609 adam qatysty. Bul – aqparattyq júıede tirkelgen partııa músheleriniń 85,5 %-y. Saılaýshylardyń basym bóligi, ıaǵnı 29 215 adam onlaın daýys berdi. 9394 partııalyq dástúrli ádisti paıdalanyp, saılaý ýchaskelerine keldi.
«Osy kórsetkishterdiń ózi-aq elimizde ǵana emes, búkil Orta Azııada tuńǵysh ret uıymdastyrylǵan jańa saıası qural – praımerızge jurttyń erekshe qyzyǵýshylyq tanytqanyn jáne onyń óz deńgeıinde ótkenin aıqyn kórsetti. Saılaý qorytyndylary boıynsha búkil málimet «Praımerız» aqparattyq júıesine tolyq salynyp, https://nurotan.kz jáne https://primaries.kz saıttarynda barshaǵa qoljetimdi. Qalaǵan adam kirip, kóre alady. Jalpy, praımerız nátıjesinde Elbasy bastamasymen byltyr qolǵa alynǵan partııany «qaıta jandandyrý» baǵdarlamasy túıindeldi. Osylaısha, «Myqty lıderler – myqty partııa» qaǵıdaty boıynsha túbegeıli jańǵyryp, qatary jańa tulǵalarmen tolyqty», deıdi Nur Otan partııasynyń Qostanaı oblystyq fılıaly tóraǵasynyń birinshi orynbasary Eldar Kúzenbaev.
Qostanaı oblysy