Qarttar men múmkindigi shekteýli jandarǵa arnalǵan qaıyrymdylyq aksııasy "Salaýatty Astana" JShS bazasynda ótti, dep habarlaıdy Egemen.kz ákimdiktiń resmı saıtyna silteme jasap.
Sharanyń maqsaty – osy sanattaǵy qazaqstandyqtar máselesine qoǵam nazaryn aýdarý, sondaı-aq olardyń ómir súrý sapasyn jaqsartý. Barlyq sanıtarlyq normalardy saqtaı otyryp ótken aksııaǵa 50-den astam adam qatysty.
– Erekshe adamdarǵa erekshe kútim qajet. Biz úshin kez-kelgen naýqas qymbat. Múmkindigi shekteýli jandar úshin biz mamandardyń úıden tekserýlerin únemi uıymdastyramyz, kómekshi qyzmetkerler múmkindigi shekteýli qarttardy medısınalyq mekemelerge alyp baryp, úılerine jetkizip beremiz», – deıdi "Salaýatty Astana" JShS fılıalynyń jetekshisi Almagúl Bazarova.
Kúni boıy qarttar men múmkindigi shekteýli naýqastar ish qurylys múshelerin, júrekti ýltradybystyq tekserýden ótti, sonymen qatar kardıolog, LOR, hırýrg, nevropatolog, endokrınolog sııaqty mamandar qyzmetin aldy. Qaıyrymdylyq aksııasy aıasynda aýyr naýqas qarttarǵa azyq-túlik paketteri taratyldy. Sharaǵa erekshe balalary bar kóp balaly analar da keldi.
– Men erekshe balanyń anasymyn. Ol árdaıym erekshe kútimdi jáne turaqty tekserýlerdi qajet etedi. Búgin dárigerlerge kórsetken aqysyz qyzmeti úshin alǵysym sheksiz, – deıdi kópbalaly ana Janar Berdiqulova.
Halyqtyń áleýmettik osal toptary úshin "Salaýatty Astana" JShS aqysyz medısınalyq qoldaýdyń kepildendirilgen kólemi sheńberinde áleýmettik terezeni paıdalanýǵa múmkindik beredi (kezeksiz dárigermen keńesý).
Qazirgi ýaqytta "Salaýatty Astana" JShS-ne tirkelgenderdiń sany 70 myńǵa jýyqtaıdy, onyń ishinde kóp balaly analar – 348, múgedekter – 932, jalǵyzbasty qarttar – 18, az qamtylǵan otbasylar – 77.