Almatyda Kókjaılaý aýmaǵynda júzege asyrylýy josparlanǵan Almaty SuperSki taý kýrorty jobasy boıynsha qoǵamdyq tyńdaýlar aıaqtaldy. Tyńdaý qorytyndysy boıynsha qatysýshylardyń basym bóligi Almaty taý klasterin damytý bastamasyn qoldady, dep habarlaıdy Egemen.kz.
Birneshe saǵatqa sozylǵan ashyq talqylaý barysynda jobaǵa qatysty ekonomıkalyq, týrıstik, áleýmettik jáne ekologııalyq máseleler keńinen qarastyrylyp, qoǵam ókilderi men sarapshylar, ekologtar men kásipkerler, sport salasynyń mamandary men qala turǵyndary óz pikirlerin bildirdi.
Qoǵamdyq tyńdaý kezinde jobanyń ekonomıkalyq tıimdiligine de erekshe nazar aýdaryldy. Spıkerlerdiń aıtýynsha, taý klasterin damytý myńdaǵan jańa jumys ornyn ashýǵa múmkindik beredi. Joba tolyq iske asqan jaǵdaıda shamamen 20 myńǵa jýyq adam jumyspen qamtylady dep kútiledi.
Tyńdaý barysynda jastar máselesi de qozǵaldy. Qatysýshylar halyqaralyq deńgeıdegi týrıstik jobalardyń júzege asýy jastarǵa jańa múmkindikter ashyp, olardyń shetelge ketý deńgeıin tómendetýge áser etýi múmkin ekenin atap ótti.
Budan bólek, ekologııalyq qaýipsizdik máseleleri de keńinen talqylandy. Joba ókilderi qurylys halyqaralyq ekologııalyq talaptardy eskere otyryp júrgiziletinin jáne tabıǵı landshaftqa túsetin júktemeni azaıtý boıynsha arnaıy sharalar qarastyrylǵanyn málimdedi. Sondaı-aq jaýaptylar qoǵamdyq baqylaý men saraptamalyq monıtorıng jalǵasatynyn aıtty.
Andreı Kýkýshkın: Almaty taý klasteriniń ekonomıkaǵa qyzmet etetin kezi keldi
Osylaısha birneshe saǵatqa sozylǵan ashyq talqylaýlar nátıjesinde týrıstik joba basym daýyspen qoldaý tapty. Aldaǵy ýaqytta tehnıkalyq qujattardy ázirleý, memlekettik saraptamalardan ótkizý jáne ınfraqurylymdyq daıyndyq jumystary kezeń-kezeńimen júrgizilmek.