Almatyda Kók-Jaılaý shatqalyndaǵy Almaty SuperSki taý kýrorty jobasyna qatysty qoǵamdyq tyńdaýlar jalǵasyp jatyr. Talqylaýdyń negizgi taqyryptarynyń biri – jobanyń eńbek naryǵyna áseri men jastar úshin ashylatyn múmkindikteri týraly boldy, dep jazady Egemen.kz.
Tyńdaý barysynda qoǵamdyq keńes múshesi Ermek Qojamsúgirov joba aıasynda shamamen 15 myń jumys orny ashylady degen aqparattyń ras-ótirigin surady. Joba ókilderi qurylys kezeńinde de, kýrort iske qosylǵannan keıin de myńdaǵan jańa jumys orny qurylatynyn rastady.
«Iá, jumys oryndary ashylady. Bul – aýqymdy ınfraqurylymdyq ári týrıstik joba. Oǵan qurylys, servıs, qonaqúı bıznesi, kólik, sport jáne týrızm salalarynyń mamandary qajet bolady», delindi talqylaý barysynda.
Andreı Kýkýshkın: Almaty taý klasteriniń ekonomıkaǵa qyzmet etetin kezi keldi
Tyńdaý qatysýshylary taý klasterin damytý Qazaqstandaǵy jas mamandardy elde ustap qalýdyń mańyzdy faktoryna aınalýy múmkin ekenin de atap ótti. Joba qoldaýshylarynyń pikirinshe, zamanaýı jumys oryndarynyń ashylýy men halyqaralyq týrızmniń damýy jastarǵa shetelge ketpeı-aq Almatyda mansap qurýǵa múmkindik beredi.
«Qalada halyqaralyq deńgeıdegi iri jobalar paıda bolǵan kezde jastar óz elinde damý múmkindigin kóredi. Bul kadrlardyń shetelge ketýin azaıtýǵa tikeleı áser etedi», degen pikir aıtyldy tyńdaý barysynda.
Qatysýshylardyń sózinshe, Almaty SuperSki tek týrıstik nysan retinde emes, shaǵyn jáne orta bızneske jańa múmkindik beretin, Almatynyń ınvestısııalyq tartymdylyǵyn arttyratyn ári qalanyń halyqaralyq týrıstik ortalyq retindegi mártebesin kúsheıtetin uzaqmerzimdi ekonomıkalyq joba retinde qarastyrylyp otyr.
Atalǵan joba sheńberinde 20 myńǵa deıin jumys orny ashylýy múmkin ekeni aıtylǵan edi.