Dárigerlerge materıaldyq qoldaý kórsetý úshin bıýdjet shyǵysy artty. Bul týraly Úkimet basshysynyń orynbasary Álıhan Smaıylov aıtyp berdi, dep habarlaıdy Egemen.kz
"2020 jylǵa arnalǵan makroekonomıkalyq kórsetkishterdiń naqtylanýy – eldegi qazirgi jaǵdaıdy jáne álemdik konıýktýrany eskere otyryp, qalyptastyryldy. Boljam ózgeristeri naqty sektor ósiminiń saqtalýyn jáne qyzmetter salasynyń birtindip qalpyna kelýin qamtamasyz etýge baǵyttalǵan. Memleket basshysynyń tapsyrmasyna sáıkes naqtylaýdyń negizgi mindeti – dárigerlerge materıaldyq qoldaý kórsetý jáne pandemııanyń taralýynyń yqtımal ekinshi tolqyny boıynsha aldyn alý sharalaryn qabyldaý boldy. Osy mindetterdi sheshý úshin bıýdjet shyǵystary ulǵaıtyldy", deıdi Álıhan Smaıylov.
Úkimetten bólingen 236 mlrd teńgeniń jartysynan kóbi ıgerilmegeni belgili boldy. Osyǵan oraı Álıhan Smaıylov memlekettik organdar men jergilikti atqarýshy organdardyń basshylaryna bıýdjet qarajatyn tez arada ıgerý kerek ekenin eskertti.
Úkimet basshysynyń orynbasary: "Qarjy jylynyń aıaqtalýyna 55 jumys kúni qaldy. Naqtylaýdy eskere otyryp, osy jyldyń sońyna deıin 4,2 mlrd teńgeni ıgerý qajet. Keıbir shyǵystar boıynsha áli kúnge deıin konkýrstyq rásimder aıaqtalmaǵanyn kórip otyrmyz. Josparlanǵan bıýdjettik baǵdarlamalardan basqa shuǵyl maqsattarǵa Úkimet rezervinen qosymsha 236 mlrd teńge bólingen. Qazirgi tańda bar bolǵany onyń 111 mlrd teńgesi nemese 47 paıyzy ǵana ıgerildi", dep atap ótti.