Taýarlarǵa ilespe júkqujattardy (TIJ) resimdeý jónindegi qanatqaqty joba 2020 jylǵy 1 qarashadan bastap iske qosylady dep josparlanýda. Bul týraly Qarjy mınıstrliginiń Memlekettik kirister komıteti habarlady.
Osylaısha, jańa jumys júıesi boıynsha TIJ resimdeý Qazaqstan Respýblıkasynyń Memlekettik shekarasyn EAEO elderimen ótkenge deıin qajet. Sondaı-aq qanatqaqty joba sheńberinde EAEO elderimen ózara saýdada eksporttyq jáne ımporttyq operasııalardy júzege asyrý kezinde TIJ resimdeý kózdelgen.
Komıtettiń baspasóz qyzmeti atap ótkendeı, resimdelgen TIJ-diń bolýy avtomobıl ótkizý pýnktterinde taýarǵa ilespe qujattardy skanerleý qajettiligin boldyrmaıdy, bul EAEO elderimen memlekettik shekaradan ótý prosesin jedeldetedi.
Jalpy, qanatqaqty joba 2021 jylǵy 1 naýryzdan bastap TIJ mindetti engizýge «jumsaq» kóshý úshin júzege asyrylady. Pılotty júrgizý kezinde ákimshilik jaýapkershilik sharalary qoldanylmaıdy. Joba salyq tóleýshilerge TIJ-men jumys isteýge beıimdelýge, olardyń esep júıelerin jáne satyp alýshylarmen jáne jetkizýshilermen ózara árekettesýdi ornatýǵa arnalǵan.
TIJ resimdeý úshin Halyqqa qyzmet kórsetý ortalyqtarynan alýǵa bolatyn ESQ kómegimen elektrondyq shot-faktýralardyń aqparattyq júıesin paıdalaný týraly kelisimge qol qoıý arqyly EShF AJ-da tirkelý qajet. EShF AJ-da tirkelý jáne jumys isteý tegin júzege asyrylatynyn atap ótken jón.
Memlekettik kirister komıteti EAEO elderimen ózara saýdada syrtqy ekonomıkalyq qyzmettiń barlyq qatysýshylaryn keıinnen TIJ mindetti resimdeýge birtindep kóshý úshin qanatqaqty jobaǵa qatysý boıynsha daıyndyq is-sharalaryn ótkizýge shaqyrady.
Sondaı-aq qanatqaqty joba aksızdeletin taýarlardy ótkizý jáne Dúnıejúzilik saýda uıymynyń alyp qoıý tizbesindegi taýarlardy (Taýarlardyń osy tizbesimen Eýrazııalyq ekonomıkalyq komıssııa keńesiniń 2015 jylǵy 14 qazandaǵy № 59 sheshiminde tanysýǵa bolady) jáne elektrondyq shot-faktýralar vırtýaldy qoıma modýli arqyly jazyp beriletin taýarlardy (taýarlardyń osy tizbesimen Qazaqstan Respýblıkasy Premer-Mınıstriniń birinshi orynbasary – Qazaqstan Respýblıkasy Qarjy mınıstriniń 2019 jylǵy 23 sáýirdegi № 384 buıryǵymen tanysýǵa bolady) ótkizý kezinde TIJ resimdeýdi kózdeıdi deıdi komıtet mamandary.
TIJ – Qarjy mınıstrligi Memlekettik kirister komıtetiniń «Elektrondyq shot-faktýralar» aqparattyq júıesinde («EShF» AJ) elektrondyq nysanda resimdeletin taýarǵa ilespe qujat. TIJ resimdeý jáne resimdeý tártibin saqtaý jónindegi normalar Salyq kodeksiniń 176-babynda aıqyndalǵan.