Tuńǵysh Prezıdent Nursultan Nazarbaev taıaýda búkil el boıynsha taǵy 100 myń áleýmettik az qamtylǵan otbasyǵa 50 myń teńge kóleminde qosymsha ataýly tólem uıymdastyrýdy tapsyrǵany belgili. Bul maqsatqa «Birgemiz» qorynan 5 mlrd teńgege jýyq qarjy bólinip, birjolǵy qarjylaı kómekke jumsaldy, dep habarlaıdy Egemen.kz.
«Nur Otan» partııasy Qostanaı oblystyq fılıalynyń baspasóz qyzmeti «Elbasynyń tapsyrmasy boıynsha «Nursultan Nazarbaev Qorynyń» qoldaýymen qarjy «Birgemiz» qorynyń shotyna tústi» - dep málimdedi.
Qazirgi tańda bir rettik áleýmettik tólemdi Qostanaı qalasynyń 5106 turǵyny alyp úlgergen. Kómek qarajatty alýshylardyń 7 sanaty bar.
- Olardyń qatarynda turmysy tómen kópbalaly otbasylar, muqtaj múgedekter, múgedek balany tárbıelep otyrǵan otbasylar, eń tómengi zeınetaqy alatyn jáne halyqtyń áleýmettik álsiz tobyna jatatyn zeınetkerler, jetim balalar (tul jetim balalar men asyraýshysynyń birinen aırylǵan balalar), Otan soǵysyna qatysýshylar men múgedekter jáne solarǵa teńestirilgender, tyl eńbekkerleri bar, - deıdi Birgemiz qorynyń oblystyq fılıalynyń tóraǵasy Seraly Ahmetov.
Qor tóraǵasynyń sózinshe, kómek alýshylardyń tizimin burynǵydaı ákimder usynady. Al fılıal bul joly buryn kómek kórsetilmegen azamattardyń áleýmettik qoldaýǵa ıe bolýyn qadaǵalaıdy.
Esterińizge sala keteıik, «Birgemiz» qory osy jyldyń naýryz aıynda Tuńǵysh Prezıdent, «Nur Otan» partııasynyń tóraǵasy Nursultan Nazarbaevtyń bastamasymen koronavırýspen kúres jaǵdaıynda halyqtyń áleýmettik osal toptaryn qoldaý maqsatynda qurylǵan bolatyn. Osy ýaqyt aralyǵynda 550 myńnan astam muqtaj azamatqa qor qarajatynan 50 myń teńgeden qarjylaı qoldaý kórsetilgen.