Tórtinshi synyp oqıtyn qostanaılyq Shyńǵys Aǵybaev estý qabileti zaqymdanǵan balalar arasynda ótken halyqaralyq mýzykalyq onlaın-festıvaldyń jeńimpazy atandy.
«MED-EL juldyzy» atty mýzyka festıvaline qostanaılyq jas darynmen qatar, Reseı, Ýkraına sııaqty kóptegen eldiń ónerpaz órenderi qatysqan. Shyńǵys baıqaýǵa Qostanaı qalasynyń ortalyǵynda túsirilgen «Rise like a phoenix» ániniń beınebaıanyn jiberipti.
– Ulym otıtpen aýyryp, úsh jasynda múldem estý qabiletin joǵaltty. Tórt jasqa tolǵan soń, ımplant ornattyq. Tili qalyptasqan soń, balamyzdyń án salýdy unatatynyn ańǵardyq. Sóıtip, vokal úıirmesine berdik. Keıin bıge jazylyp, eki úıirmeni qatar alyp júrdi. Shyńǵys estý qabileti zaqymdanǵan balalarǵa arnalǵan arnaıy balabaqshada tárbıelendi. Biraq qazir kópshilikpen birge jalpy bilim beretin mektepke baryp júr, – dedi jas ánshiniń anasy Lázzat Aǵybaeva.
Qazylar alqasy án festıvaline qatysqan 85 úmitkerdiń 16-syn ǵana fınalǵa jibergen. 10 qazanda ótken aqtyq kezeńniń qorytyndysy boıynsha úzdikter qatarynan daralanyp shyqqan Shyńǵys jeńimpaz atandy. Anasynyń aıtýynsha, bul daryndy ónerpazdyń alǵashqy jeńisi emes. Ol buǵan deıin Polsha astanasynda da án shyrqap, jeńis tuǵyrynan kórinipti.
Qostanaı oblysy