Qostanaı oblysynda «Brakoner» jedel aldyn alý sharasy bastaldy. Eki kúnnen beri oblys aýmaǵynda 22 mobıldi top reıd sharalaryn ótkizýde. Ár mobıldi jasaqtyń quramynda tabıǵat qorǵaý polıseıleri, jergilikti atqarýshy organdardyń ókilderi, orman sharýashylyǵy jáne basqa da múddeli qyzmetterdiń mamandary bar.
Tabıǵat qorǵaýmen aınalysatyn polısııa basqarmasynyń málimetine sensek, sońǵy 9 aıdyń ishinde oblys aýmaǵynda 498 quqyq buzýshy ákimshilik jaýapkershilikke tartylypty. Onyń 197-si ańshylyq, 301-i balyq aýlaý erejelerin buzǵan. Tabıǵat baılyǵyna zańsyz qol suqqan suǵanaqtarǵa jalpy mólsheri 5 mln teńgeniń ústinde ákimshilik aıyppul salynyp, búginge deıin onyń 4 mln teńgesi óndirilip alynǵan.
Munyń syrtynda, tabıǵat saqshylary zańsyz ańǵa shyǵý, sırek kezdesetin jabaıy janýarlardy atý, jasyl aǵashtardy kesý sııaqty ekologııalyq qylmystarǵa qatysty jalpy sany 31 qylmystyq is qozǵap otyr. Polıseılerdiń aıtýynsha, qazir eki qylmystyq is boıynsha tergeý amaldary aıaqtalyp, is sotqa jiberilgen.
– «Brakoner» sharasynyń maqsaty – tabıǵatty qorǵaýdy kúsheıtý jáne ekologııalyq qylmystarǵa tosqaýyl qoıý. Máselen, 5 qyrkúıekten ańǵa shyǵý maýsymy bastalǵaly, tabıǵat qorǵaý jónindegi zań talaptaryn buzǵan 78 adamnyń ústinen ákimshilik hattama toltyrylyp, 800 myń teńgeden astam aıyppul salyndy. Sondaı-aq Qylmystyq kodekstiń «Zańsyz ańshylyq» baby boıynsha 4 qylmystyq is qozǵalyp, tergeý sharalary júrip jatyr. Qazirgi tańda aımaqta tabıǵatty qorǵaý zańnamasyn saqtaý máselesine qatysty baqylaý kúsheıtildi, – dedi oblystyq PD jergilikti polısııa qyzmeti basqarmasy tabıǵat qorǵaý polısııasy bóliminiń aǵa ınspektory Ǵaziretáli Álimǵazın. Aımaqta júrip jatqan «Brakoner» jedel aldyn alý sharasy qarasha aıynyń 11-ine deıin jalǵasady.
Qostanaı oblysy