Elordada shekteý sharalaryn buzǵandarǵa 138 mln teńge ákimshilik aıyppul salyndy. Bul týraly Nur-Sultan qalalyq taýarlar men kórsetiletin qyzmetterdiń sapasyn jáne qaýipsizdigin baqylaý departamentiniń basshysy Zeken Ysqaqov málimdedi, dep habarlaıdy Egemen.kz.
"15 qazandaǵy málimetke sáıkes, mobıldi toptar 1 973 nysanǵa tekseris júrgizip, nátıjesinde 634 jeke, laýazymdy jáne zańdy tulǵa 138 mln teńgeden astam somaǵa ákimshilik jaýapkershilikke tartyldy. Ákimshilik jaýapkershilikke tartylǵan tulǵanyń kinási tanylǵan jaǵdaıda oǵan aıyppuldy qysqarǵan tártippen tóleý múmkindigi usynylady. Salynǵan 634 aıyppuldyń 535-i boıynsha 114 mln 891 myń teńge tólendi. Kásipkerlik sýbektisiniń shaǵymymen 4 is qaraý úshin ákimshilik sotqa jiberildi. Jeke, laýazymdy jáne zańdy tulǵalardyń shekteý jáne karantın sharalaryn buzǵany úshin jaza qoldanylady", - dedi Zeken Ysqaqov.
Onyń aıtýynsha, QR Ákimshilik quqyq buzýshylyq týraly kodekstiń 425-babyna sáıkes, jeke tulǵalarǵa 30 aılyq eseptik kórsetkish, shaǵyn kásipkerlik nemese kommersııalyq emes uıym sýbektileriniń laýazymdy tulǵalaryna 230 AEK, orta kásipkerlik sýbektilerine 310 AEK, iri kásipkerlik sýbektilerine 1 600 AEK kóleminde ákimshilik aıyppul salynady.
"Elordada 8 mobıldi top jumys isteıdi. Olar kúndelikti 30-70 nysanǵa monıtorıng júrgizedi. Shekteý jáne karantın sharalaryn buzý anyqtalǵan jaǵdaıda polısııa qyzmetkerleri baıanat jazady. Sodan keıin materıal qaraý jáne ákimshilik shara qabyldaý úshin Taýarlar men kórsetiletin qyzmetterdiń sapasyn jáne qaýipsizdigin baqylaý departamentiniń aýdandyq basqarmalaryna jiberiledi", - dedi Z.Ysqaqov.