Bul baǵytta mamandar daıarlaý – ózindik máni bar másele
Qazaqstandaǵy volonterlik qyzmet azamattyq qoǵamdy qurýda ózekti máselelerdiń biri bolyp tabylady. Alaıda, búginde osy salanyń júıelendirý men is-qımyldardyń úılesimin qajet etetini aqıqat. Kásipqoı eriktilerdi daıyndaý da otandyq volonterlik qozǵalysty nyǵaıtý jolynda mańyzdy qadam bolmaq. «Qamqor» eriktiler qozǵalysy sheńberinde ashylǵan respýblıkalyq mektep dál osy mindetti oryndaýǵa arnalǵan. Jobany bastap ári qoldap otyrǵan – Bilim jáne ǵylym mınıstrliginiń Jastar isi komıteti. Al uıymdastyrý tarapynan «Samuryq» damý ortalyǵy» qoǵamdyq jastar qory jaýapty bolyp otyr.
Bul baǵytta mamandar daıarlaý – ózindik máni bar másele
Qazaqstandaǵy volonterlik qyzmet azamattyq qoǵamdy qurýda ózekti máselelerdiń biri bolyp tabylady. Alaıda, búginde osy salanyń júıelendirý men is-qımyldardyń úılesimin qajet etetini aqıqat. Kásipqoı eriktilerdi daıyndaý da otandyq volonterlik qozǵalysty nyǵaıtý jolynda mańyzdy qadam bolmaq. «Qamqor» eriktiler qozǵalysy sheńberinde ashylǵan respýblıkalyq mektep dál osy mindetti oryndaýǵa arnalǵan. Jobany bastap ári qoldap otyrǵan – Bilim jáne ǵylym mınıstrliginiń Jastar isi komıteti. Al uıymdastyrý tarapynan «Samuryq» damý ortalyǵy» qoǵamdyq jastar qory jaýapty bolyp otyr.
Taıaýda Astana qalasynda «Jastar arasynda «Qamqor» eriktiler qozǵalysyn damytý» degen taqyrypta semınar-trenıng bolyp ótti. Oǵan elimizdiń túkpir-túkpirinen kelgen ártúrli áleýmettik baǵyttaǵy jobalarmen aınalysatyn, úılestirýshi, psıholog, qor jetekshisi jáne erikti bolyp qyzmet atqaratyn 30 adam qatysty.
Oqytý mynadaı baǵyttar boıynsha júrgizildi: eriktilermen qarym-qatynas; komanda aıasynda jumys isteý; qujattar aınalymy; aqparat kózderimen jumys júrgizý; memlekettik organdarmen, bıznes pen úkimettik emes uıymdarmen birlesip qyzmet atqarý; fandraızıng; jobalardy ázirleý jáne basqarý; zııatkerlik kartalardy qoldaný. Árbir qatysýshynyń qolyna semınarǵa arnalǵan jumys jospary usynyldy. Onda tańǵy jattyǵýdan bastap, tipti, úı tapsyrmasyna deıin barlyq áreketter kórsetilgen. Jalpy, oqytý úrdisiniń tıimdiligin kóterý maqsatynda tapsyrmalar kóptep berildi. Osylaısha, uıymdastyrýshylar kásibı daǵdylardy damytýǵa basa nazar aýdardy. Semınar barysynda bolashaq bapkerler volonterlik qyzmet salasyndaǵy san alýan máselelerdi talqyǵa saldy. Sonymen qatar, múgedekter, kámeletke tolmaǵandar, tolyq emes otbasylar, qylmys jasaǵandar sekildi kategorııalar boıynsha jeke mysaldar qarastyryldy.
Saýalnama qorytyndysyna súıensek, volonterler 20% – jetimderge, taǵy 20% – múgedekterge, 17% – mádenı sharalardy uıymdastyrýda, 13,3% – bilim mekemelerine, 10% – qart adamdarǵa kómektesýge daıyn. Al esirtkige táýeldi jáne baspanasy joq jandardy az ǵana adam (3,3% kóp emes) qoldaýǵa nıet bildiripti. Sondaı-aq jaýap bergenderdiń 13%-y kómekke zárý adamdardyń qatarynda dinı qaýymdar qurbandary, áıelder qaýymy, aýyldyq jerlerdiń turǵyndary, jumyssyzdar men turmysy nashar azamattar bar dep kórsetti.
Túıindeı kele, tyńdaýshylardyń kópshiligi osyndaı semınar-trenıngterdiń kóptep ótkizilýin qalaıtyndaryn jetkizip, áleýmettik baǵyttaǵy máselelermen aınalysatyn jastarǵa neǵurlym myqty qoldaýdyń kórsetiletinine senim artty. Bul jolǵy is-sharanyń tegin túrde ótkizilgeni de erekshe mánge ıe. Aldaǵy ýaqytta mundaı daıarlyq jastar arasynda volonterlik qozǵalystyń keńinen nasıhattalýyna septigin tıgizýi tıis. Oqytý nátıjesinde barlyq qatysýshylarǵa sertıfıkattar tabys etildi.
Alınur TILEMIS.
ASTANA.